საქართველოს სახალხო არტისტი ამირან ქადეიშვილი ხანგრძლივი ავადმყოფობის შემდეგ, 85 წლის ასაკში, დღეს დილით, ბოხუას კლინიკაში გარდაიცვალა.

იგი ოზურგეთის თეატრის მსახიობთა იმ თაობის წარმომადგენელი იყო, რომლებმაც გასული საუკუნის 60-იანი წლებიდან მოყოლებული დიდი წარმატება მოუტანეს ამ  თეატრს.

ამირან ქადეიშვილს კინოსა და თეატრში შესრულებული აქვს სხვადასხვა როლები. მის მიერ შესრულებული როლებია: ნიკოია („სემირამიდას ბაღები“), კვეგვე ტარბა („მთვარის მოტაცება“), კურა-მუჰამედი („ციმბირელი პაპა“) , ჭოლა („პირველი მერცხალი“), ნიკო („გაქცევა გათენებისას“), ხირხალა („სიყვარული ყველას უნდა“), კობიძე („სახლი ლესნაიაზე“), ერმილე მამალაძე („მევლუდი“).

ასევე მონაწილეობდა ფილმებში: „კავკასიის ტყვე“, „როგორ ვიცხოვრო უშენოდ“, „თბილისი, პარიზი, თბილისი“, „ჟამი მოქცევის“, „სათნოებათა კიბე“ და სხვა.

ოზურგეთის თეატრის წინ გაიხსნა მისი სახელობის ვარსკვლავი.

2018 წელს ამირან ქადეიშვილს გადაეცა ჯილდო „ხელოვნების ქურუმი“.

„ძნელია იპოვო სიტყვები… ჩვენი საამაყო და ერთგული ამირან ქადეიშვილი შეუერთდა მარადისობას!!!

გვიყვარდა და ვუყვარდით. გვეამაყებოდა მისი ადამიანობა, ნიჭი, თავმდაბლობა, პიროვნული სითბო და ხიბლი… თვითონ ოზურგეთის თეატრით ამაყობდა…

ვუსამძიმრებთ ოჯახს, შვილებს, შვილიშვილებს, ახლობლებს და პირველ რიგში, ქალბატონ ალდონას, ალდონა ერქომაიშვილი ვინაც მოკლე ხანში დაკარგა ძვირფასი ადამიანები – ძმა, ანზორ ერქომაიშვილი და მეუღლე – ამირან ქადეიშვილი, მისთვის ოჯახის წევრები, ჩვენთვის კი ქართული კულტურის ბუმბერაზი და გამორჩეული სახელები“+_წერს ოზურგეთის სახელმწიფო თეატრი თავის ფეისბუქგვერდზე.

მოიწონეთ და გააზიარეთ სტატია:

მსგავსი სტატიები