დონეცკისა და ლუგანსკის თვითგამოცხადებული რესპუბლიკებიდან რუსეთის საზღვარი 10 000-ზე მეტმა დევნილმა გადმოკვეთა, – ინფორმაციას სააგენტო „ინტერფაქსი“ საკუთარ წყაროზე დაყრდნობით ავრცელებს. მათივე ინფორმაციით, ჯერჯერობით ქალების, ბავშვების და მოხუცების ევაკუაცია ხორციელდება.

გუშინ თვითგამოცხადებული ე.წ. დონეცკისა და ლუგანსკის სახალხო რესპუბლიკების ე.წ. ლიდერებმა, დენის პუშილინმა და ლეონიდ პასეჩნიკმა მოსახლეობის ევაკუაცია გამოაცხადეს. ისინი ამის მიზეზად უკრაინის მხრიდან სიტუაციის გამწვავებას ასახელებენ.

პირველი სამგზავრო მატარებელი გუშინ ლუგანსკიდან რუსეთში, ქალაქების ალჩევსკის და სვერდლოვსკის (ლუგანსკის ოლქის ქალაქები) გავლით რუსეთში გავიდა. ამ შემადგენლობამ 650 ადამიანი გადაიყვანა. ამის შესახებ ე.წ. ლუგანსკის სახალხო რესპუბლიკის სააგენტო „ლუგანსკინფოცენტრი“ იუწყება.

ამავე სააგენტოზე დაყრდნობით რუსული მედია იუწყება, რომ ამ დროისთვის უკვე ევაკუირებულია 13,5 ათასი კაცი.

გუშინვე ცნობილი გახდა, რომ რუსეთის პრეზიდენტის, ვლადიმერ პუტინის დავალებით, რუსეთის მთავრობა თითოეულ დევნილს, ვინც დონეცკიდან როსტოვში გადავა, დახმარების სახით, 10 ათას რუბლს გადაუხდის.

გავრცელებული ინფორმაციით, ე.წ. დონეცკის სახალხო რესპუბლიკიდან რუსეთში 700 000-მდე ადამიანის ევაკუირება იგეგმება.

_„უნდა დავინახოთ ის, რისი დანახვაც შეიძლება და არ გამოგვრჩეს. აშკარაა უკრაინის საზღვრის გასწვრივ ჯარების განლაგება, ისევე როგორც რუსეთის ტერიტორიაზე, ასევე ბელარუსში. უკრაინის წინააღმდეგ სამხედრო აგრესიის განხორციელების ყველა შესაძლებლობა აშკარაა და ეს ფაქტად რჩება,“- განაცხადა გერმანიის კანცლერმა ოლაფ შოლცმა მიუნხენის უსაფრთხოების სამიტზე სიტყვით გამოსვლისას.

მისი თქმით, მოლაპარაკებებისთვის ყველა შესაძლებლობის გამოყენება უნდა მოხდეს.

მოიწონეთ და გააზიარეთ სტატია:

მსგავსი სტატიები