„ადამიანების გასაჭირის დასაძლევად მნიშვნელოვანია ერთმანეთის გვერდით დგომა და სიყვარული“

დღეს, ოზურგეთის სახელმწიფო დამატრული თეატრის მცირე სცენაზე  ჩოხატაურის მუნიციპალიტეტის კულტურის ცენტრთან არსებული ბავშვთა და მოზარდთა თეატრალური სტუდიამ ქეთევან კუკულავას მონო პიესის მიხედვით დადგმული სპექტაკლი  _„ პანდემია“ წარმოადგინა.

სპექტაკლში მთავარ როლს ჩოხატაურის მუნიციპალიტეტის სოფელ ჩაისუბნის საჯარო სკოლის მე-12 კლასის მოსწავლე მარიამ შარაშენიძე ასრულებს.

მარიამ შარაშენიძის სასცენო ხელოვნება, წელს, ჩოხატაურში  ნოდარ დუმბაძის მესამე თეატრალურ ფესტივალზე ვნახეთ _ ჩოხატაურის სახალხო თეატრმა ნოდარ დუმბაძის „ხაზარულას“ მიხედვით განხორციელებულ მუსიკალურ პერფონანსში „ხაზარულა“, (რეჟისორ გოჩა ხვიჩიას დადგმა), მანამდე კი ასევე ნოდარ დუმბაძის ნაწარმოებების მიხედვით ქეთევან კუკულავას დადგმაში „გეყურებათ თქვენ (?!)“ მარიამმა ხატია განასახიერა . ეს სპექტაკლი ოზურგეთის თეატრის სცენაზე იყო ნაჩვენები.

არ არის  ადვილი ოზურგეთის თეატრის მომთხოვნ მაყურებლის, რომელიც საუკეთესო დადგმებითაა განებივრებული, მოხიბვლა, თუმცა მარიამმა ეს შეძლო. მისი გმირია მარტოხელა მსახიობი ქალი, რომელიც პანდემიის დროს წერს და დგამს სპექტაკლს, რომელიც ონლაინ რეჟიმში უნდა გადაიცეს.

როგორც მონო-სპექტაკლის შემდეგ ოზურგეთის თეატრის სამხატვრო ხელმძღვანელმა ვასილ ჩიგოგიძემ აღნიშნა,  მონო სპექტაკლი ზრდასრულმა ადამიანმა უნდა ითამაშოს, რომელსაც განვლილი ცხოვრებისა და დღევანდელობიდან გამომდინარე, ამ თემასთან აქვს შეხება, და მიუხედავად ასაკისა, ამას მარიამი შესანიშნავად ახერხებს. ასე გახსნილი, თავისუფალი, უკომპლექსო _ამ ბავშვს ძალიან დიდი მომავალი აქვს. თავად   კი ეს არის ტექსტი ავტორის გულიდან ამოხეთქილი, სწორედ პანდემიიდან და უმძიმეს მდგომარეობიდან გამომდინარე, რაც მსოფლიოს დაატყდა თავს და ადამიანის სულიდან ამოთქმული ეს ტექსტი  თქვენ მიიტანეთ მაყურებლამდე. მისასალმებელია, როდესაც ახალი თაობა დაინტერესებულია თეატრით და თამაშობენ სპექტაკლებში._აღნიშნა ვასილ ჩიგოგიძემ.

სპექტაკლის გარშემო თავის მოსაზრება გამოთქვა ოზურგეთის რესურსცენტრის ხელმძღვანელმა ლელა იმედაშვილმა:

_ ამ სპექტაკლში ტექსტს მთელი შინაგანი რწმენით გადმოსცემდა და აღფრთოვანებული ვარ მარიამის  სამსახიობო ოსტატობით. ძალიან სასიხარულოა, რომ რეგიონში სკოლის მოსწავლეები ჩართულნი არიან ასეთ ღონისძიებებში. ნიჭიერი ახალგაზრდების წარმოჩენა არის ყველაზე მაგარი საქმე რასაც თქვენ, ქალბატონო ქეთევან, აკეთებთ _თქვა ლელა იმედაშვილმა.

როგორც ამ მონო სპექტაკლის შემქნელმა, ქეთევან კუკულავამ განაცხადა, ჩოხატაურში, კულტურის ცენტრთან არსებული ბავშვთა და ახალგაზრდული თეატრალური დასი შეიქმნა არასამთავრობო ორგანიზაცია „ქალები ქალებისთვის“მხარდაჭერით და მათი ინიციატივით დაიდგა ეს სპექტაკლი.

_ ამ პატარა სპექტაკლით ჩვენ ვამბობთ, რომ ადამიანების გასაჭირის დასაძლევად მნიშვნელოვანია ერთმანეთის გვერდით დგომა და სიყვარული _თქვა სპექტსკლის რეჟისორმა.

სპექტაკლს მარიამის მშობლებიც ესწრებოდნენ. როგორც გავიგეთ, მარიამს 7 და-ძმა ჰყავს და თავად მეშვიდე შვილია.

წარმატებები მარიამ შარაშენიძეს.

მსგავსი სტატიები