„ნამახვანი ჰესის“  – კაშხლის მშენებლობა გადაიდო

_ ის მიზეზი, რაც იწვევდა გულწრფელ წუხილს, მოხსნილია – კაშხლის მშენებლობა გადაიდო, ვიდრე პასუხი არ გაეცემა ყველა კითხვას,– ამის შესახებ ეკონომიკისა და მდგრადი განვითარების მინისტრმა ნათია თურნავამ განცხადა.

მინისტრის თქმით, კომპანია, დღეს კანონით მინიჭებული უფლებამოსილების ფარგლებში საგზაო სამუშაოებს ახორციელებს.

„მსურს მივმართო საპროტესტო აქციის მონაწილეებს – ის მიზეზი, რაც იწვევდა მათ გულწრფელ შეკითხვებს და წუხილს „ნამახვანი ჰესის” უსაფრთხოებასთან დაკავშირებით, პრაქტიკულად დღეს მოხსნილია – კომპანიასთან შეთანხმებით, კაშხლის მშენებლობა გადაიდო და ის არ დაიწყება უახლოესი რამდენიმე თვის განმავლობაში, ვიდრე ყველა კითხვას არ გაეცემა პასუხი. კომპანია, კანონით მინიჭებული უფლებამოსილების ფარგლებში დღეს ახორციელებს საგზაო სამუშაოებს“,- განაცხადა ნათია თურნავამ.

მისივე თქმით, დაწყებულია ღია დიალოგი ყველა დაინტერესებულ პირთან და ექსპერტთან და გახსნილია ყველა კვლევა, რაც წლების მანძილზე აქვს მომზადებული კომპანიას.

„მზად ვართ, თითოეულ ამ კვლევაზე ვისაუბროთ – რა კითხვები არსებობს, როგორ გავაუმჯობესოთ საჭიროების შემთხვევაში და ვიდრე არ გვექნება სრული გარანტიები და ეს გარანტიები არ იქნება ცნობილი მოსახლეობისთვის, ვიდრე არ დავარწმუნებთ მათაც, რომ „ნამახვანი ჰესის” კაშხალი არის რეალურად უსაფრთხო, რაშიც ჩვენ ვართ დარწმუნებულები, მაგრამ გვინდა, რომ მეტი ნდობა შეიქმნას მოსახლეობაში. მანამდე კაშხლის და წყალსაცავის მშენებლობა არ დაიწყება“, – აღნიშნა ეკონომიკის მინისტრმა.

ინფორმაციას ეკონომიკისა და მდგრადი განვითარების სამინისტროს პრესსამსახური ავრცელებს.

აქციის ერთ-ერთმა აქტივისტმა  ხვიჩა ვაშაყმაძემ ასეთი სახის პოსტი გაავრცელა..

„დღეს ნამახვანჰესის მშენებლობის მოწინააღმდეგეთა სპონტანური აქცია გუმათჰესთან გაიმართა, სადაც პოლიციამ გზა გადაკეტა და მოქალაქეებს გადაადგილების უფლება ისევ შეუზღუდა. ხელისუფლებას გუმათში მობილიზებული ყავდა სპეციალური დანიშნულების რაზმი და წყლის მანქანა, თუმცა აქციის მონაწილეებმა კიდევ ერთხელ დაამტეიცეს, რომ ისინი პრობლემის ძალისმიერი მეთოდით მოგვარების მომხრეები არ არიან და ხელისუფლების ასეთ პროვოკაციას მხოლოდ მშვიდობიანი მეთოდებით უპასუხებენ. გუმათშიც გაჩნდა კარავი და დაანონსდა ისიც, რომ შესაძლებელია მალე საპროტესტო აქცია დედაქალაქში გაიმართოს“.

მსგავსი სტატიები