პროკურატურამ 250 კილოგრამი „ჰეროინის“ უკანონო შეძენის, შენახვის, საქართველოში უკანონოდ შემოტანის და საერთაშორისო ტრანზიტით გადაზიდვის ფაქტზე ორ პირს ბრალდება წარუდგინა

საქართველოს პროკურატურამ 250 კილოგრამი ნარკოტიკული საშუალება „ჰეროინის“ უკანონო შეძენის, შენახვის და საქართველოში უკანონოდ შემოტანის ფაქტზე ორ პირს ბრალდება წარუდგინა.

პროკურატურის ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ ერთ-ერთმა ბრალდებულმა საზღვარგარეთ უკანონოდ შეიძინა და შეინახა 250 კგ. ნარკოტიკული საშუალება ჰეროინი, რომელიც ტვირთში – სველი ხელსახოცების შეფუთვების შიგთავსში მოათავსა და „წითელი ხიდის“ სასაზღვრო გამშვები პუნქტის გავლით საქართველოში უკანონოდ შემოიტანა, რის შემდეგაც აღნიშნული ტვირთი ხელვაჩაურის რაიონის, სოფელ ახალ სოფელში საწყობში შეინახა. მოგვიანებით კი ნარკოტიკული ნივთიერებების ნაწილი მეორე ბრალდებულს გადასცა, ხოლო ნაწილი, რომელიც შენიღბულად იყო ტვირთში შენახული, პოლონეთის სახელმწიფოში ტრანზიტით საერთაშორისო გადაზიდვის მიზნით, კერძო პირის სატვირთო ავტომანქანის მისაბმელში დატვირთა და საბაჟო გამშვები პუნქტი ბათუმის პორტში გადაიყვანა.

2025 წლის 21 ოქტომბერს, სამართალდამცველების მიერ ჩატარებული სატვირთო ავტომანქანის ჩხრეკის შედეგად ამოღებული იქნა 250 კგ. ნარკოტიკული საშუალება ჰეროინი.

დაკავებულებს ბრალდება საქართველოს სისხლის სამართლის კოდექსის 260-ე მუხლის მესამე ნაწილის „ა“ ქვეპუნქტით;, 260 პრიმა მუხლის მესამე ნაწილის ,,ა’’ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო გადაზიდვა), 260 სეკუნდა მუხლის მეცხრე ნაწილის ,,ა’’ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო გადაცემა) 262-ე მუხლის მეოთხე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების საქართველოში უკანონოდ შემოტანა, ტრანზიტით საერთაშორისო გადაზიდვა) წარედგინა, რაც სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს.

პროკურატურამ ბრალდებულებისთვის აღკვეთის ღონისძიების სახით პატიმრობის შეფარდების შუამდგომლობით სასამართლოს უკვე მიმართა.

წყარო: ipn.ge

მსგავსი სტატიები