გარდაიცვალა ცნობილი პოეტი, საქართველოს მწერალთა კავშირის გურიის ორგანიზაციის თავმჯდომარე ჯემალ დობორჯგინიძე.

დაიბადა ლანჩხუთის რაიონის სოფელ მამათში.

დაამთავრა ქუთაისის სახელმწიფო პედაგოგიური ინსტიტუტი და თბილისის სახელმწიფო თეატრალური  ინსტიტუტი.

იმსახურა ჯარში, ათი წელი იმუშავა ლეიტენანტის ჩინით მილიციის ბავშვთა ოთახის ინსპექტორად; თვრამეტი წელი მამათის კულტურის სახლის დირექტორად, ათი წელი ამავე კულტურის სახლის ხალხური შემოქმედების განყოფილების გამგედ. მუშაობს ქ. ლანჩხუთში ვ. წულაძის სახელობის თეატრისა და კინოს მუზეუმში მეცნიერ მუშაკად; მისი პირველი ლექსი გამოაქვეყნა გაზეთ “სოფლის ცხოვრებაში” 1961 წელს. გამოცემული აქვს ლექსების კრებულები: „გვირილა“, „შავი შაშვი ჩიოდა“, „იის გორა“, „ჭიპიტო და ჭაპიტო“, (2-ჯერ), „დედულეთის ზაფხული“, „იის გორიდან მოვდივარ“,  „კესოს წიგნი“,  „აღსარებები და საგალობლები უფლისადმი“. არის 12 წიგნის ავტორი; გამოცემული აქვს არაერთი საბავშვო ლექსების კრებული.

20 დეკემბერს 80 წელი შეუსრულდებოდა.

_„გარდაიცვალა ჩემი მამიდაშვილი, ცნობილი პოეტი და გურიის კოლორიტი ჯემალ დობორჯგინიძე, არასოდეს მსგავსი პოსტი არ გამომიქვეყნებია, მაგრამ იმდენად დამწყვიტა გული ამ ღვთისნიერი და პატიოსანი ახლობლის გარდაცვალებამ, რომ ეს გავბედე და, ვისაც კი შესაძლებლობა მოგეცემათ, ჩემი უსაყვარლესი ჯემოს დაკრძალვა ოთხშაბათისთვის იგეგმება და ქვედა მამათში განხორციელდება მისი საბოლოო გაცილება იმიერ სამყაროში…“_წერს მწერალი მერაბ შათირიშვილი.

გაზეთ „ალიონის“ რედაქცია თანაუგრძნობს გარდაცვლილის ოჯახს და ახლობლებს.

p.s.ეს ფოტო 3 წლის წინ ტაო-კლარჯეთში ყოფნისას გადავიღეთ, იშხნის ტაძართან.

მოიწონეთ და გააზიარეთ სტატია:

მსგავსი სტატიები