„სალომე ზურაბიშვილი დღეს გულწრფელად ევროპული ძალების სრულფასოვან მოკავშირედ იქცა“ – თინა ხიდაშელი

„თუკი საკუთარ ეგოზე მაღლა დავდგებით, პირად სიყვარულ-სიძულვილს ცოტა ხანი გვერდზე გადავდებთ უცებ დავინახავთ, რომ პრეზიდენტი სინამდვილეში დღეს გულწრფელად ევროპული ძალების სრულფასოვან მოკავშირედ იქცა“, – ასე აფასებს „სამოქალაქო იდეის“ პლატფორმის დამფუძნებელი, თავდაცვის ექსმინისტრი თინა ხიდაშელი საქართველოს პრეზიდენტის სალომე ზურაბიშვილის მიერ გამართულ საგანგებო ბრიფინგს.

მისივე თქმით, ზურაბიშვილმა თავის გამოსვლაში ხელისუფლება შეცდომებში, დანაშაულებრივ ქმედებებსა და უმოქმედობაში ამხილა.

„ყველაფერზე პასუხი გასცა, დაადასტურა და ჩამოაწიკწიკა რაც კი ჩვენ აქამდე ერთად ან ცალ-ცალკე გვითქვამს და რასაც გაავებული ხელის ქნევით სისულელეს და გამოგონილს ეძახის ხელისუფლება. ყველა შეცდომა, დანაშაულებრივი ქმედება და უმოქმედობა, ხელისუფლება „ფარდა ახდილი“ დატოვა.

კიდევ ერთხელ, შესაძლოა, მოგვწონს ან არ მოგვწონს, მაგრამ ქვეყნის პრეზიდენტია და დღეს ჩვენი თანამზრახველი იყო. თანამზრახველი კი ის არის მაინცდამაინც ყოველთვის ბოლომდე ყველაფერში რომ არ ეთანხმები და არ გეთანხმება, მაგრამ ერთი გენერალური ხაზი გაქვთ და ერთი მიზნისკენ მიდიხართ, თორემ აბა ისე შენიანი იქნებოდა. მოკლედ მგონია, რომ დღეს უნდა მივიღოთ სწორედ ასეთად.

PS მეც უფრო ბედნიერი ვიქნებოდი ყველა ამ სიტყვისთვის ბოლოში გვირგვინად გვარამიას შეწყალებისთვის რომ მოეწერა ხელი, მაგრამ მაშინ ჩვენიანი იქნებოდა“, – წერს თინა ხიდაშელი.

PIA.GE

მსგავსი სტატიები