დავით მუჯირი: ვულოცავ სკ „ლანჩხუთს“ და ოზურგეთის „მერცხალს“ დიდ გამარჯვებას

გურიის ფეხბურთის ფედერაციას ცნობილი ვეტერანი ფეხბურთელი, თბილისის „დინამოს“ მცველი, საერთაშორისო კლასის სპორტის ოსტატი დავით მუჯირი თავკაცობს, იგი იყო ყოფილი საბჭოთა კავშირის ჩემპიონი, თასის ორგზის მფლობელი, 1981 წელს, „კარლ ცეისთან“ თასების მფლობელთა თასის ფინალში ისტორიული გამარჯვების მონაწილე და თანაზიარი.

2011  წლის 17 მაისსსაქართველოს სპორტისა და ახალგაზრდულ საქმეთა სამინისტროს  გადაწყვეტილებით, თბილისის „დინამოს“ მიერ თასების მფლობელთა თასის  მოპოვების 30 წლის იუბილესთან დაკავშირებით 1981 წლის თბილისის „დინამოს“ სრულ შემადგენლობასა და სამწვრთნელო შტაბთან ერთად — დავით მუჯირს საქართველოს სპორტის რაინდის წოდება მიენიჭა.

22 ნოემბერს, დავით მუჯირი ქ. ოზურგეთში „მერცხალისა“ და ქუთაისის „მართვეს“მატჩს დაესწრო და წარმატებულად ჩატარებული შეხვედრის შემდეგ ოზურგეთელ ფეხბურთლებეს მე-4 ლიგაში გადასვლა მიულოცა. დავით მუჯირმა გაზეთ „ალიონთან“ გააკეთა კომენტარი:

_ 2023 წელი გურიის ფეხბურთის განვითარებისათვის ძალიან წარმატებული გამოდგა.

გულით მინდა მივულოცო ქალთა საფეხბურთო კლუბ „ლანჩხუთს“ საქართველოს პირველობაზე უმაღლესი ლიგის გუნდებს შორის წარმატებული გამოსვლა. ისინი თავიანთი ისტორიის მანძილზე მესამედ გახდნენ საქართველოს ჩემპიონები.

ასევე ვულოცავ ოზურგეთის „მერცხალს“ დიდ ფეხბურთში დაბრუნებას, იმ დიდ ფეხბურთში, რომელსაც მე-4 ლიგა ჰქვია ჯერ-ჯერობით და ვუსურვებ მალე მე-3, მე-2, შემდეგ პირველ და თვით უმაღლეს ლიგაში დაბრუნებას.

ძალიან მინდა, წარმატებით იასპარეზონ და კვლავ გაახარონ გურულები, როგორც ადრე ახარებდნენ.

ჩემს ბავშვობაში ხშირად დავდიოდი „მერცხალის“ თამაშებზე და ახლაც მინდა, როგორც გურიის ფეხბურთის ფედერაციის პრეზიდენტმა ოზურგეთელი ფეხბურთელებისაგან ის სიამოვნება მივიღო, რასაც ადრე ვღებულობდით.

დავით მუჯირმა ბავშვთა ფეხბურთის განვითარებაზეც გააკეთა კომენტარი:

_ძალიან მნიშვნელოვანია ბავშვთა ფეხბურთის განვითარება, რისთვისაც ისინი მონაწილეობენ სხვადასხვა ტურნირებში. შარშან ჩვენ ქ. ოზურგეთში ჩავატარეთ მერაბ მეგრელაძის სახელობის ტურნირი; წელს _ლანჩხუთში ევგრაფი შევარდნაძის სახელობის ტურნირი.

25-26 ნოემბერს, გვიმბალაურში, საფეხბურთო აკადემიის ბაზაზე ჩავატარებთ ბორის პაიჭაძის სახელობის ტურნირს, რომელშიც გურიის, იმერეთის, აჭარის, სამეგრელოს ნაკრები გუნდები მიიღებენ მონაწილეობას.

ასეთი ტურნირები ხელს უწყობენ ბავშვთა ფეხბურთის განვითარებას და პერსპექტიული ფეხბურთელების გამოვლინებას.

მსგავსი სტატიები