გრაფიკისა და ბეჭდური მხატვრობის გამოფენა ოზურგეთში

9 სექტემბერს,  მერაბ ბერძენიშვილის სახელობის ოზურგეთის მუნიციპალიტეტის თანამედროვე სახვითი ხელოვნების ცენტრში შემოქმედებითი სახელოსნო GURIAN ART წევრთა და მოწვეულ მხატვართა დაზგური გრაფიკისა და ბეჭდური მხატვრობის გამოფენა გაიმართა.

გამოფენაზე წარმოდგენილია ვახტანგ მეგრელიშვილის, სერგო გოგოლაძის, ოქსანა სტრატიჩუკის (უკრაინა) , ირინა ხარატიშვილის, ია არსენიშვილის, დოდო თაყაიშვილის, თამაზ, გია, საბა დარჩიების, დავით უღრელიძის, ლიკა კერვალიშვილის, ხათუნა სახელაშვილის, ნინა დარჩიას, ,ქეთი მესხის, თანდილა თავართქილაძის ნამუშევრები.

გახსნის ცერემონიალზე სიტყვებით გამოვიდნენ: ხელოვნებათმცოდნე ლია ურუშაძე, სახვითი ხელოვნების ცენტრის დირექტორი ავთანდილ თავართქილაძე, პროექტის ხელმძვანელი, თბილისის სამხატვრო აკადემიის პროფესორი ვახტანგ მეგრელიშვილი, გურიის მხატვართა კავშირის თავმჯდომარე თამაზ დარჩია, უკრაინელი მხატვარი ოქსანა სტრატიჩუკი, მხატვარი დოდო თაყაიშვილი.

_„შემოქმედებითი მივლინება ოზურგეთში“, ოზურგეთის სახვითი ხელოვნების ცენტრის ერთ-ერთი წარმატებული პროექტია, რომლის მიზანი ხელოვნების პოპულარიზაცია და ორიგინალური ადგილობრივი კულტურული პლატფორმის ჩამოყალიბებაა.

ცენტთან არსებული შემოქმედებითი სტუდია-სახელოსნო „GURIAN ART“ უკვე მერვედ მასპინძლობს პროფესიონალ მხატვართა ჯგუფს და ტრადიციულად სთავაზობს საინტერესო, თავისუფალ შემოქმედებით სივრცეს, ნოვატორული იდეების განხორციელებისათვის.

წელს იგი 4 ეტაპად გაიმართა. ბოლო ეტაპზე შემოგვიერთდა უკრაინელი მხატვარი ოქსანა სტრატიჩუკი, რომელმაც იაპონური დანადგარი „მაკულიტო“გადასცა ჩვენს სახელოსნოს. იგი წელს ჩვენთან მეორედაა და ძალიან მოხარული ვართ მისი ამ გამოფენაში მონაწილეობით“ _ განაცხადა ავთანდილ თავართქილაძემ.

_„სიახლეები და ხელახალი ექსპერიმენტები მნიშვნელოვანია ხელოვანისთვის და ხელოვნებისთვის ზოგადად. ახალი ტექნოლოგიებით ახლის ძიება და ახალ შედეგებზე გასვლა უპირველესი ამოცანაა შემოქმედებისთვის. ოზურგეთის სამხატვრო გალერეა ყოველთვის მზადაა ამ ექსპერიმენრებისთის. მადლობა მათ“ _ განაცხადა პროფესორმა ვახტანგ მეგრელიშვილმა.

_„ვფიქრობ, რომ ეს შესანიშნავი პროექტი საქართველოში ერთადერთია გრაფიკის დარგში. აქ ჩამოდიან მხატვრები სხვადასხვა მხარიდან, უცხოეთიდან, რომლებიც ეცნობიან ერთმანეთის ტექნიკურ და ტექნოლოგიურ ნიუანსებს.

შემოქმედებითი პროცესების გაზიარება და გაცვლა საუკეთესო ატმოსფეროს ქმნის “ _ გვითხრა ბათუმელმა გრაფიკოსმა სერგო გოგოლაძემ.

_„მოხარული ვარ გურიაში ყოფნით. მადლობელი ვარ შესაძლებლობისთვის, რომ გავატარე დრო საოცარ ხალხთან, შემოქმედებით ატმოსფეროში“ _გვითხრა უკრაინელმა მხატვარმა ოქსანა სტრატიჩუკმა.

_„ვფიქრობ,„შემოქმედებითი მივლინება ოზურგეთში“ და აქ მიღებული გამოცდილება ძალიან დამეხმარება ჩემს საქმიანობაში. დიდი მადლობა პროექტის ორგანიზატორებსა და არაჩვეულებრივ პედაგოგებს თავდაუზოგავი შრომისა და ჩვენდამი გამოჩენილი ყურადღებისა და გულისხმიერებისათვის“ _ გვითხრა მოქანდაკე ლიკა კერვალიშვილმა.

_„პირველად ვმონაწილეობ მსგავს პროექტში. ძალიან მომწონს ბეჭდვის ხელოვნება. ოფორტი მრავალი ექსპერიმენტის საშუალებას იძლევა. ერთი ნახატი სხვადასხვა განზომილებითაა წარმოდგენილი და ეს შესანიშნავია“_ გვითხრა პროექტის მონაწილე ახალგაზრდა მხატვარმა საბა დარჩიამ.

მსგავსი სტატიები