„ჩვენ ევროკავშირი გვავალდებულებს, არ გავასაჯაროოთ გამარჯვებულთა ვინაობა, რადგან ეს არის პერსონალური მონაცემები“ : ვნებათა ღელვა პროექტ „მწვანე გურიას“ ირგვლივ

ავტორი გაზეთი „ალიონი“

27  მარტს ოზურგეთის ტექნოპარკში ევროკავშირის მხარდაჭერით მიმდინარე პროექტის „მწვანე გურია _ ადგილობრივი დემოკრატიისა და სოფლის განვითარების მხარდაჭერა ინკლუზიური და მდგრადი მწვანე ზრდისათვის“, ფარგლებში   CENN, პარტნიორ ორგანიზაციებთან – ახალგაზრდა პედაგოგთა კავშირთან, დემოკრატიის ინსტიტუტთან და ქედის ადგილობრივ სამოქმედო ჯგუფთან ერთად,  პროექტის შუალედური შედეგებისა და დაგეგმილი სამუშოების გაცნობითი შეხვედრა გაიმართა.

აღნიშნულ  შეხვედრას ესწრებოდნენ CENN-ის ლაგ-ის მმართველი საბჭოს წევრები (ნაწილი) , ლაგის წევრები, პარტნიორი ორგანიზაციების წარმომადგენლები.

CENN-ის გარემოსდაცვითი პროექტების მენეჯერმა ნინო გაფრინდაშვილმა ისაუბრა საგრანტო კონკურსის ფარგლებში დაფინანსებული პროექტების და მათი მიმართულებების შესახებ.

როგორც ნინო გაფრინდაშვილმა განაცხადა, 25 პროექტი დაფინანსდა ოზურგეთის, 13 პროექტი _ ლანჩხუთის; 12 პროექტი_ ჩოხატაურის მუნიციპალიტეტებში.

CENN-ისა და Institute of Spatial Planning-ის ორგანიზებით, ოზურგეთის, ჩოხატაურისა და ლანჩხუთის ადგილობრივი სამოქმედო ჯგუფის (LAG) შერჩეული წევრები  2-ჯერ ხუთდღიანი სასწავლო ვიზიტით ავსტრიაში იმყოფებოდნენ. მისი

თქმით, ევროპული სოფლის განვითარების  მიდგომების დანერგვა ხდება გურიაში.

ნინო გაფრინდაშვილმა განაცხადა, რომ საგრანტო კონკურსში გამარჯვებულთა ვინაობა არ იქნებოდა წარმოდგენილი ამ შეხვედრაზე, ვინაიდან ევროკავშირის მოთხოვნით პერსონალური მონაცემების გასაჯაროების უფლება მათ არ ჰქონდათ.

მისი თქმით, ოზურგეთში შევიდა 190 განაცხადი, საიდანაც მეორე ეტაპზე 79 განცხადება გადავიდა, მონიტორინგის ეტაპი 50 განცხადებამ გაიარა,ხოლო ხელშეკრულება გაფორმდა 25 ბენეფიციართან. ევროკავშირი მათ 1,071,864 ლარს დაუფინანსებს, ხოლო გამარჯვებულების წილობრივი მონაწილეობა 516,821 ლარი იქნება.

მანვე მცირე საგრანტო კონკურსებზეც ისაუბრა. იდეათონში _9 გამარჯვებული გამოავლინეს, რომლებსაც, თითოეულს  1000 დოლარი გადაეცათ. ასევე სათემო ინიციატივებისათვის  განხორციელებისათვის მცირე ზომის კონკურსებებს განახორციელებენ.

შეხვედრაზე სიტყვა ითხოვა აღნიშნული საგრანტო პროექტის მონაწილემ, ტურისტული სახლის „სამზეურას“ დამფუძნებელმა მარინა ჩიხლაძემ. მან განაცხადა, რომ უსამართლოდ დაჩაგრეს ამ კონკურსში:

_ მე ლაგის წევრი ვარ და როგორც ამომრჩეველი, ასევე პროექტის მონაწილე, ვითხოვ, მომისმინოთ…

როცა კონკურსი გამოცხადდა, მივიღე მონაწილეობა და ვთვლი, რომ გავიმარჯვე ამ კონკურსში, რადგან წარმატებით გავიარე ყველა ეტაპი, საბოლოოდ კი მაინც უარი მითხრეს დაფინანსებაზე. როცა გავასაჩივრე, მივიღე  შაბლონური პასუხი, _ თქვენ წარმატებით გაიარეთ ყველა ეტაპი, მაგრამ კონკურენციას ვერ გაუძელითო.

ჩიხლაძემ განაცხადა, რომ ამ ზერელე პასუხით არანაირად კმაყოფილი არ დარჩა და თქვა ისიც, რომ სრულიად შესაძლებელი იყო, გასაჩივრების შემდეგ, მომხდარიყო მცირე კორექტირებები, რაც მისი პროექტის დაფინანსებას  შესაძლებელს გახდიდა.   ასევე,   მისივე თქმით, ათეულ ათასობით ღირებულების ზოგი პროექტიდან, რომელიც დააფინანსეს, დაწყებულიც კი არ არის სამუშაოები.

მარინა ჩიხლაძემ ვრცლად ისაუბრა ლაგის საარჩევნო პროცესზე და თქვა, რომ ის საარჩევნო ნორმების დარღვევით ჩატარდა.  ასევე თქვა, რომ პროექტის ხელმძღვანელებმა შეცვალეს თითქმის ყველა დათქმა, რაც თავდაპირველად განაცხადეს. მაგალითად, მან განაცხადა, რომ თავიდან ნათქვამი ჰქონდათ, კონკურსში მონაწილეობას ვერ მიიღებდნენ ლაგ-ის მმართველი საბჭოს წევრები.  განმარტა ისიც, რომ აკრძალვა არავისთვისა კარგი, მაგრამ კვოტა რომ დაწესებულიყო ამ კუთხით, სხვა ელფერი მიეცემოდა და ეჭვს არ გამოიწვევდა. ჩიხლაძემ ასევე თქვა, რომ თავიდან განაცხადეს,   ვინც მონაწილეობას მიიღებდა საგრანტო კონკურსში , უნდა ჰქონოდა მოქმედი ბიზნესი, გამორჩეული უნდა ყოფილიყო მაღალი აქტივობით და ასე შემდეგ.    2024 წლის დეკემბერში კი უნდა  დასრულებულიყო  ყველა პროექტი, რის დარღვევის შემთხვევაში გატარდებოდა ღონისძიებები.

_რა  მიდგომაა, როცა 20 ათასი ლარის ფარგლებში წარდგენილი პროექტის ავტორს კონკურენციაში მამყოფებთ 100 ათასიანი პროექტის წარმდგენთან? ვინ ადგენს ამ ნორმებს? ცოტა სარკასტულად რომ ვიკითხო, კულაკებს აყალიბებენ?_ ეს და კიდევ მრავალი კითხვა დასვა მან.

მარინა ჩიხლაძემ ასევე მოითხოვა იმ 25 გამარჯვებული პროექტის ავტორისა და შესაბამისად, საგრანტო თანხის რაოდენობის გასაჯაროება, რაზეც პროექტის მენეჯერისაგან უარი მიიღო:

_ ჩვენ ევროკავშირი გვავალდებულებს, რომ არ გავასაჯაროოთ გამარჯვებულთა ვინაობა, რადგან ეს არის პერსონალი მონაცემები _ თქვა ნინო გაფრინდაშვილმა.

„_მე ვფიქრობ, რომ  სიცრუეა, როცა გაფრინდაშვილი ამბობს, რომ გამარჯვებული პროექტების ავტორების გასაჯაროება არ შეიძლება. პირიქით, მე რაც გამიგონია და წამიკითხავს,  ევროკავშირი ითხოვს სრულ გამჭირვალობას. ყოველ შემთხვევაში, თუ პერსონალური მონაცემების გამოქვეყნებისგან თავის შეკავება ვინმემ ურჩია მათ დონორი ქვეყნებიდან, შეეძლოთ, ეკითხათ გამარჯვებული პროექტების ავტორებისთვის, იყვნენ ან არიან თუ არა თანახმა ამ ინფორმაციის გასაჯაროების და გამოექვეყნებინათ.  ან რის ეშინიათ? ხომ ამბობენ, რომ ყველაფერი ნორმების დაცვით მოხდა. თუ ჩვენ ევროკავშირი განვითარებისთვის გვეხმარება, თავკომბალასავით, უმეტესად   ძალიან დიდ გრანტებს უნდა გასცემდეს? თანამონაწილეობის თანხა თუ 20-30 ათასი ლარი  მექნება, რად მინდა გრანტი? ეს ყველაფერი ურთიერთ შეთანხმებით უნდა მოხდეს და ისე მოვიდეს ჩვენამდე _ თავდაუზოგავად მშრომელ ადამიანებამდე.  როცა კითხვებს ვსვამ და  ლაგის წევრი ვითხოვ ყურადღებას, ვიღაც მემუქრება დარბაზიდან გაყვანით _ ამის უფლებასაც აძლევენ თავს. მათ, სულ ცოტა, უნდა იცოდნენ, რომ მე ამომრჩეველი ვარ, არსად წასვლას არ ვაპირებ და მუდამ იქნება ჩემგან კითხვების ნაკადი.  მით უფრო, როცა ამის საფუძველს თავად მაძლევენ.  „მწვანე გურიას“ მათი კარგად შეფუთული რეკლამა ვერ გახდის პოპულარულს. ის კონკრეტული „სასტავის“ პროექტია და როგორც   გურიის, ასევე   ამ მომენტში ოზურგეთის მოსახლეობის თითქმის 90%-მა (ყველაზე კარგი ვარიანტი) არაფერი არ იცის მის შესახებ! არადა,  რეგიონის განვითარების სტრატეგიული გეგმა ჰქვია!  ასევე, არ მომხდარა, რომ თუნდაც ერთხელ დაცდენოდეთ, რომ ცოტათი მაინც შეეშალათ ან მცირე გადაცდომა მოუვიდათ.  აქეთ კი ყველა კითხვის პასუხად გამტყუნებენ.  აქვთ საოცარი გონორი, რომ ყველაფერს ზუსტად  აკეთებენ.  ამიტომ ვაპირებ ბრძოლას ამ ყველაფრის   უფრო მეტად გასაჯაროებისთვის. აუცილებლად  შევხვდები CENN-ის ხელმძღვანელებს. წარმოუდგენელია, რეგიონში ასეთი გასაიდუმლოებულ ქმედებებთან შეგუება. მით უფრო, ახლა ლაგი უკვე დამოუკიდებელ  ა(ა)იპ ორგანიზაციად დარეგისტრირდა. და რას ველოდოთ, ისევ სათავოსოდ გამოიყენებს უპირატეს მდომარეობას  მავანი მომავალ საგრანტო კონკურსებში? სასაცილო კი ის არის, რომ ლაგის თავმჯდომარე, კიღურაძე, კიდევ უამრავი ორგანიზაციის თავმჯდომარეა და  საგრანტო კონკურსის პროცესის, როგორც მის ნათქვამში გამოიკვეთა, დიდად არაფერი არ იცის…აბა, რას გვპირდებოდნენ, ლაგის მმართველი საბჭო თქვენი დამხმარე, გზამკვლევი და  მხარდამჭერი იქნებაო? მე ვსვამ საეჭვო კითხვებს, ესენი კიდევ ,რომ გამაჩუმონ,  მიცხადებენ, რომ ბრალდებებს ვუყენებ… მგონი, პროკურორიც გამხადეს. კიდევ ერთხელ ვამბობ, არ შევეგუები ასეთ მოცემულობას და მუდამ დავსვამ კითხვებს,  _განაცხადა  „ალიონთან“ საუბარში მარინა ჩიხლაძემ.

„გურიის სამოქალაქო ცენტრის“ გუნდის წევრმა 2020 წლიდან, ორგანიზაციის გამგეობის წევრმა კოკა კიღურაძემ განაცხადა, რომ ლაგის მმართველი საბჭოს წევრები არ მონაწილეობდნენ საგრანტო კონკურსის შეფასების პროცესში, ამდენად ვერ უპასუხებს ჩიხლაძის ბრალდებებს, ხოლო ნინო გაფრინდაშვილმა კი თქვა, რომ გრანტი არ არის ჰუმანიტარული დამხმარება (?!).

შეხვედრაზე სიტყვით გამოვიდა წარმატებული მეწარმე, ლაგის მმართველი საბჭოს წევრი  დავით თენიეშვილი, რომელმაც განაცხადა, რომ მან მიიღო საგრანტო დაფინანსება, მაგრამ მთლიანად მოცილებული იყო კონკურსის ყველა შეფასებას.

დავით თენიეშვილის გამოსვლის შემდეგ ნინო გაფრინდაშვილმა განაცხადა, რომ იგი შესთავაზებს გრანტის მიმღებ პირებს, რომ მათი თანხმობის შემთხვევაში, წარსდგნენ ლაგის წევრების და საზოგადოების წინაშე.

გასაჯაროვდება თუ არა  ვინ გაიმარჯვა საგრანტო კონკურსში და წარდგებიან თუ არა ისინი საზოგადოების წინაშე,  ამას მომავალი გვიჩვენებს.

გაცნობითი შეხვედრები ჩოხატაურის და ლანჩხუთის მუნიციპალიტეტებშიც გაიმართა.

გაზეთი „ალიონი“, #5, 31 მარტი, 2025 წ.

მსგავსი სტატიები