ვოლოდიმირ ზელენსკი – ნატო-მ რუსეთის მიერ ბელარუსში განლაგებული საშუალო რადიუსის „ორეშნიკის“ რაკეტები ლეგიტიმურ სამიზნედ უნდა მიიჩნიოს

უკრაინის პრეზიდენტი ვოლოდიმირ ზელენსკი მიიჩნევს, რომ ნატო-მ რუსეთის მიერ ბელარუსში განლაგებული საშუალო რადიუსის „ორეშნიკის“ რაკეტები ლეგიტიმურ სამხედრო სამიზნედ უნდა განიხილოს.

უკრაინის პრეზიდენტმა ამის შესახებ ბელარუსულ ოპოზიციურ მედიასაშუალება „ზერკალოსთან“ ინტერვიუში განაცხადა.

მისი თქმით, რუსეთი და ბელარუსი „შოუს“ აწყობენ „ორეშნიკის“ სისტემის ბელარუსის ტერიტორიაზე განლაგებით, ჯერჯერობით მიწოდებულია მხოლოდ „შესაბამისი მანქანები“ და არა მთელი სისტემა.

„ჩემი აზრით, ნატო-მ „ორეშნიკი“ ლეგიტიმურ სამიზნედ უნდა მიიჩნიოს. უკრაინა, თავის მხრივ, შეაფასებს ამ საფრთხეს. თუმცა, მან (ალექსანდრე ლუკაშენკომ) არ უნდა ითამაშოს თამაშები, რადგან ამ ნაბიჯების შემდეგ რუსები „ორეშნიკს“ ბელარუსის ტერიტორიაზე ლუკაშენკოსთან კონსულტაციის გარეშე შეიტანენ“, – განაცხადა ზელენსკიმ.

მისი თქმით, რუსები და ბელარუსები ბელარუსის ტერიტორიაზე ერთობლივი წვრთნების ჩატარებას განიხილავენ.

„ვიცი, რომ ისინი საუბრობენ ბელარუსის ტერიტორიაზე რუსეთის ფედერაციასთან ერთობლივი სამხედრო წვრთნების ჩატარებაზე. კიდევ ერთხელ. ვნახოთ, რამდენად მასშტაბური იქნება ისინი. მაგრამ როდესაც ფართომასშტაბიანი ჩატარდა, უკრაინის ტერიტორიაზე შეტევა დაიწყო. ამიტომ, ეს ყველაფერი ნამდვილად დიდ რისკებს უქმნის უკრაინას და მჯერა, რომ დიდ რისკებს ჰქმნის ბელარუსებისთვისაც“, – აღნიშნა ზელენსკიმ.

წყარო: ipn.ge

მსგავსი სტატიები