რეზა ფეჰლევის მიმართვა ირანელ ხალხს

ჩემო ძვირფასო თანამემამულეებო, დადგა გადამწყვეტი მომენტი.

დახმარება, რომელსაც ამერიკის შეერთებული შტატების პრეზიდენტი ირანის მამაც ხალხს დაჰპირდა, უკვე მოვიდა. ეს ჰუმანიტარული ჩარევაა; მისი სამიზნე ისლამური რესპუბლიკა, მისი რეპრესიების აპარატი და მისი მკვლელობის მანქანაა და არა ირანი და მისი ხალხი.

მაგრამ, ამ დახმარების მიუხედავად, საბოლოო გამარჯვება მაინც ჩვენ უნდა მოვიპოვოთ. სწორედ ჩვენ, ირანელი ხალხი, დავასრულებთ საქმეს საბოლოო ბრძოლაში. ქუჩებში დაბრუნების დრო ახლოვდება.

ახლა, როდესაც ისლამური რესპუბლიკა იშლება, ჩემი გზავნილი ქვეყნის სამხედრო, სამართალდამცავი და უსაფრთხოების ძალებისადმი ნათელია:

თქვენ დაიფიცეთ, რომ დაიცავთ ირანს და ირანელ ხალხს და არა ისლამურ რესპუბლიკასა და მის ლიდერებს. თქვენი მოვალეობაა დაიცვათ ხალხი და არა რეჟიმი, რომელმაც ჩვენი სამშობლო რეპრესიებითა და დანაშაულით მძევლად აიყვანა. შემოუერთდით ერს და დაგვეხმარეთ სტაბილური და უსაფრთხო გარდამავალი პერიოდის დაწყებაში. წინააღმდეგ შემთხვევაში, თქვენ ჩაიძირებით ხამენეის და მისი რეჟიმის დამსხვრეულ გემთან ერთად.

ჩემი გზავნილი ამერიკის შეერთებული შტატების პრეზიდენტისადმი ასეთია:

ირანის კეთილშობილი ერი, ამ რეჟიმის სასტიკი რეპრესიებისა და მკვლელობების მიუხედავად, თითქმის ორი თვის განმავლობაში მამაცურად იდგა. ახლა გთხოვთ, გამოიჩინოთ მაქსიმალური სიფრთხილე მშვიდობიანი მოსახლეობისა და ჩემი თანამემამულეების სიცოცხლის დასაცავად. ირანელი ხალხი თქვენი ბუნებრივი მოკავშირეა. თავისუფალი სამყარო და ისინი არ დაივიწყებენ თქვენს დახმარებას ირანის თანამედროვე ისტორიის ყველაზე რთულ პერიოდში.

და თქვენ, ჩემო ძვირფასო თანამემამულეებო ირანში:

ამ კრიტიკულ საათებსა და დღეებში, უფრო მეტად, ვიდრე ოდესმე, ჩვენ უნდა გავამახვილოთ ყურადღება ჩვენს საბოლოო მიზანზე: ირანის დაბრუნებაზე.

გთხოვთ, ახლა დარჩეთ თქვენს სახლებში და შეინარჩუნოთ სიმშვიდე და უსაფრთხოება. იყავით ფხიზლად და მზად, რომ დაბრუნდეთ ქუჩებში საბოლოო მოქმედებისთვის შესაბამის დროს, რასაც დეტალურად გაცნობებთ.

ჩვენ ძალიან ახლოს ვართ საბოლოო გამარჯვებასთან. მინდა, რაც შეიძლება მალე ვიყო თქვენთან ერთად, რათა ერთად დავიბრუნოთ ირანი და აღვადგინოთ იგი.” | ამბობს ვიდეომიმართვაში ირანის უკანასკნელი შაჰის უფროსი ვაჟი, რეზა ფეჰლევი.

დონალდ ტრამპმა ცოტა ხნის წინ დაადასტურა, რომ ისრაელის არმიასთან ერთად, ირანის რეჟიმის წინააღმდეგ სამხედრო მოქმედებები დაიწყო. მან მოუწოდა ირანის უსაფრთხოების ძალებს, რომ დაყარონ იარაღი. ტრამპმა ირანელ ხალხსაც მიმართა და თქვა, რომ მათი თავისუფლების საათი ახლოვდება.

მსგავსი სტატიები