ნამახვანჰესის წინააღმდეგ საპროტესტო აქციას საქართველოში ამერიკის შეერთებული შტატების და ევროკავშირის ელჩები, კელი დეგნანი და კარლ ჰარცელი გამოეხმაურნენ. კელი დეგნანის თქმით, ენერგო პროექტების განვითარებაში საზოგადოების ჩართვა უმთავრესია.

როგორც ელჩმა დეგნანმა აღნიშნა, მნიშვნელოვანია, რომ ხელისუფლება უსმენდეს, განიხილავდეს და მხედველობაში იღებდეს საზოგადოებაში არსებულ შეშფოთებას.

_„გამოხატვის თავისუფლება და ამ შეშფოთების გამოთქმის თავისუფლება ძალიან მნიშვნელოვანია, ასევე მნიშვნელოვანია, რომ მთავრობამ დაუთმოს დრო ამ შეშფოთების მოსმენას და იმუშაოს მის მოსაგვარებლად.

მთავრობამ უნდა დააბალანსოს ეს საქართველოს ენერგეტიკულ დამოუკიდებლობასა და დიფერენციაციასთან მიმართებაში, რათა საქართველო არ იყოს დამოკიდებული რუსეთზე ელექტროენერგიის გამო, საქართველოს მოქალაქეებს არ ჰქონდეთ ბევრი გადასახადი ელექტროენერგიის გამო.

ეს რთული ბალანსია, თუმცა, უმთავრესია საზოგადოების შეშფოთების მოსმენა და მათი ჩართვა ამ ენერგო პროექტების განვითარებაში“, – განაცხადა კელი დეგნანმა.

ევროკავშირის ელჩი,  კარლ ჰარცელი დიალოგისკენ მოწოდებით გამოვიდა.

_„მხარეებს მე მოვუწოდებ დიალოგის დაწყებისკენ, პლატფორმის შექმნისკენ, სადაც ყველა მონაწილე იქნება ჩართული. ვფიქრობ, ძალიან მნიშვნელოვანია ასეთ საკითხებთან დაკავშირებით გამჭვირვალობა და სოლიდური შეფასება, თუ რა დევს სასწორზე.

ასევე, მივესალმები ენერგოუსაფრთხოების საბჭოს მდივნის ჩართულობას, რაც ვფიქრობ, ორივე მხარის მიერ პოზიტიურად იქნა აღქმული. იმედი მაქვს, რომ ეს სასარგებლო იქნება პროცესის კარგი მიმართულებით წინ წაწევისკენ“, – განაცხადა ჰარცელმა.

მოიწონეთ და გააზიარეთ სტატია:

მსგავსი სტატიები