კელი დეგნანი­_„სიურპრიზი იყო მთავრობის განცხადება, რომ საქართველოს 75 მლნ ევროს დახმარება არ სჭირდება“  

_„ჩვენთვის ცოტათი სიურპრიზი იყო საქართველოს მთავრობის განცხადება, რომ მას არ სჭირდება 75 მილიონი ევრო,“ – ამის შესახებ საქართველოში ამერიკის შეერთებული შტატების საგანგებო და სრულუფლებიანმა ელჩმა კელი დეგნანმა ჟურნალისტებს განუცხადა.

ამერიკელი დიპლომატის თქმით, საქართველოსა და ევროკავშირს შორის თანამშრომლობა უნდა გაგრძელდეს.

კელი დეგნანის თქმით, კონგრესი პროცესის მიმდინარეობას აკვირდება.

„ჩვენთვის ცოტათი სიურპრიზი იყო საქართველოს მთავრობის განცხადება, რომ მას არ სჭირდება 75 მილიონი ევრო, მიუხედავად პანდემიისა, მიუხედავად უმუშევრობისა და იმ მდგომარეობისა რაც საქართველოში არსებობს. რა თქმა უნდა, ამას გარკვეულწილად გამოეხმაურება ვაშინგტონი.

ამავე დროს გასათვალისწინებელია ის, რომ რეფორმები, რომელიც მართლა უნდა განხორციელებულიყო და ამაზე დიდი მუშაობა მიმდინარეობდა გასულ წელს, საქართველოსა და ევროკავშირს შორის, უნდა გაგრძელდეს, არ უნდა შეჩერდეს, ეს მართლაც რთული და მნიშვნელოვანი რეფორმები.

ამ შემთხვევაში კონგრესი რა თქმა უნდა უყურებს როგორ მიმდინარეობს ეს პროცესები, ჩვენ საკმაოდ ახლო კოორდინაციაში ვართ საქართველოს მთავრობასთან და ვიცით რა სჭირდება საქართველოს, 75 მილიონი ევრო ეს ცოტა არ არის“, _ აღნიშნა კელი დეგნანმა.

ინფორმაციისთვის, პრემიერ–მინისტრის ირაკლი ღარიბაშვილის განცხადებით, მთავრობას გადაწყვეტილი აქვს, რომ ევროკავშირის სესხის მეორე ნაწილის აღებისგან თავი შეიკავოს.

მსგავსი სტატიები