„ეს კანონი წაართმევს ქვეყანას მომავალს“

დღეს, ქ. ოზურგეთში, „ჭადრების ბაღში“ ბენია ჩხიკვიშვილის ბიუსტთან სამოქალაქო აქტივისტების საპროტესტო აქცია გაიმართა.

ისინი საქართველოს პარლამენტში, იურიდიულ საკითხთა კომისიის სხდომაზე „უცხოური გავლენის გამჭვირვალობის შესახებ“ კანონპროექტის განხილვას აპროტესტებდნენ.

_ დღეს ჩვენ, ბენია ჩხიკვიშვილის ძეგლთან შევიკრიბეთ მოქალაქეები, რომლებიც რუსული კანონის განხილვას ვაპროტესტებთ.

ეს დღე მნიშვნელოვანია ჩვენი ქვეყნისათვის, რადგან ან გავიმარჯვებთ, ან დაბრუნდება რუსეთი ჩვენს ქვეყანაში. ყველას ვალია გამოხატოს თავისი პოზიცია ჩვენი ქვეყნისათვის და იბრძოლოს საქართველოს დამოუკიდებლობისათვის ბოლომდე.

ჩვენ ვუერთდებით პარლამენტის წინ  მიმდინარე აქციას და როცა საჭირო იქნება, როგორც რიგითი ჯარისკაცები  დავდგებით მათ გვერდით. ჩვენს სამშობლოს არავის დავუთმობთ. არა რუსულ კანონს !_განაცხადა სამოქალაქო აქტივისტმა ირმა გორდელაძემ.

_ ჩვენ ამ საზოგადოების ნაწილი ვართ, ძლიერი ჯგუფი, რომელიც შემდეგ გამოადგება საზოგადოებას.

ახლა ბენიას ძეგლთან ვდგევართ.როგორ კარგ  შეფასებას აძლევდა მას ნოე ჟორდანია, რომელიც იმავდროულად ხსნიდა, რატომ არის საქართველო პრორუსული. დიდი ტრიადა _ ფილიპე-ლენინი-სტალინი აალაგეს თავის დროზე. ადრე ნეპი აალაგეს, პუტინმაც აალაგა დემოკრატული ღირებულებები რუსეთში. წელს აგვისტოში 100 წელი სრულდება ბენია ჩხიკვიშვილის წამებიდან, რომელიც რუსეთის ჩრდილოეთში დაიღუპა. ეს თარიღი  უნდა აღვნიშნოთ.

  ღმერთმა დაიფაროს ის მოხდეს , რაც 1924 წლის შემდეგ დადგა ჩვენს ქვეყანაში _თქვა ექვთიმე თაყაიშვილის მუზეუმის მენეჯერმა რუსლან ურუშაძემ.

_ხელისუფლების პატარა ჯგუფი, რომელიც ჩრდილოელ სახელმწიფოსთან მეგობრობს, ცდილობს დააბრუნოს საზოგადოება  რუსულ ორბიტაზე. ჩვენ, უმრავლესობამ უნდა გადაწყვიტოს ჩვენი ქვეყნის ბედი, რადგან ჩვენ ვკარგავთ ევროკავშირთან ინტეგრაციის შანს.სამართლებრივი საფუძველი გვაქვს ის, რომ თვითონ ევროკავშირის სასამართლოს გაუქმებული აქვს მსგავსი კანონი, რომელიც უნგრეთმა მიიღო. შესაბამისად, ეს კანონი წაართმევს ჩვენს ქვეყანას მომავალს. ჩვენ ვალდებული ვართ, რომ ვიმოქმედოთ და ამ ქვეყანას შევუნარჩუნოთ მომავალი _განაცხადა არასამთავრობო სექტორის წარმომადგენელმა ოთარ რევიშვილმა.

კანონის „უცხოური გავლენის გამჭვირვალობის შესახებ“თავისი უარყოფითი პოზიცია დააფიქსირა სამოქალაქო აქტივისტმა მამუკა გოგუაძემ.

_რუსეთი ოკუპანტია, ჩვენ ვირჩევთ ევროპას, ჩვენი მომავალი ევროპაშია. ჩვენი მოქალაქეობრივი ვალია, ჩვენი აზრი დავაფიქსიროთ _განაცხადა ქ. ოზურგეთის #2 საჯარო სკოლის მე-10 კლასის მოსწავლე სესილი თოდრაძემ.

აქციაზე, რომელიც სამოქალაქო მოძრაობა „თავისუფლებისთვის“ მიერ იყო ორგანიზებული, ადგილობრივი არასამთავრობო სექტორი, მედია, პოლიტიკოსები და რიგითი მოქალაქეები ესწრებოდნენ.

მსგავსი სტატიები