ახალი მხატვრული ფილმი _„ბრძოლა -ბერი გაბრიელი“

დღეს, ქ. ოზურგეთში, რკინიგზის სადგურში ახალი მხატვრული ფილმის „ბრძოლა _ბერი გაბრიელი“ეპიზოდები გადაიღეს.ფილმის სცენარის ავტორი და რეჟისორია ბრაზილიისა და საქართველოს კინოაკადემიების წევრი, ქართველი და უცხოელი მაყურებლებისათვის კარგად ცნობილი გიორგი კაჭარავა. მაყურებელი მას  განსაკუთრებულად იცნობს სოსო ჯაჭვლიანთან ერთად შექმნილი ფილმით „მაიტა ნასოსი“ (2010 წ.), სადაც იგი რეჟისურის გარდა ბრაზილიელი ჟორჟის როლს ასრულებს. მან 2007 წელს ბრაზილიაში დაარსა საკუთარი კინოსტუდია „LILAYMA“. ასევე იგი ხელმძღვანელობს სტუდიებს „სინემაგია,“და „გი ემ სინემა.“ თავისივე სცენარით გადაღებული აქვს ფილმები „უკანასკნელი ბლუზი“, „დონ ჟუანის დაბადება,“ასევე _ „ორმაგი სახე,“„თოჯინების ქალაქი,“ „ფატი,“„პრეზიდენტის არჩევნები,“და ა.შ. ავტორია რომანების: “განკითხვის დღე” და “პილატე და კაიაფა”, წიგნების: “ვინ არის იესო ქრისტე”, “ბიბლიურ წინასწარმეტყველებათა აღსრულება”…

_ 2 საათიან მხატვრულ ფილმს ვიღებთ ბერ გაბრიელზე (გოდერძი ურგებლიძე). სადაც გადმოცემულია მისი რთული ცხოვრება, როგორ განუცხადა კომუნისტური აღლუმის შემდეგ, სადაც ლენინის უზარმაზარი ბანერი გაანადურა,  დაკითხვაზე ჩეკისტებს „იქ უნდა ეკიდოს ქრისტეს ჯვარცმა, და არა ლენინის სურათი. კაცს რად უნდა დიდება: დიდება ქრისტე ღმერთს“. როგორ სთავაზობდნენ ციხეში ეღიარებინა, რომ ყოველივე ეკლესიის დავალებით გააკეთა, სანაცვლოდ სიცოხლის შენარჩუნებას ჰპირდებოდნენ.   მიუხედავად ხანგრძლივი ტანჯვა-წამებისა, გაბრიელ ბერი კვლავ ურყევად იდგა. უცხოეთის პრესა აშუქებდა ამ სენსაციურ ამბავს. წლების მანძილზე ფსიქიატრიულ საავადმყოფოში ჰყავდათ გამოკეტილი…ბევრ საინტერესო ამბებს ნახავთ ამ ფილმში. გადაღებები ძირითადად მიმდინარეობდა თბილისსა და მცხეთაში, ფოთშიც გადავიღეთ ეპიზოდები, დღეს ოზურგეთის რკინიგზის სადგური „მოვრთეთ“ კომუნისტური ატრიბუტიკით.  _გვითხრა ფილმის რეჟისორმა.

გიორგი კაჭარავას თქმით, მამა გაბრიელის როლს მოზარდ მაყურებელთა თეატრის მსახიობი ზურაბ ავსაჯანიშვილი ასრულებს, ასევე ფილმში სახვადასხა როლებში დაკავებული არიან გიორგი ცაავა, ვახტანგ ნოზაძე, გიორგი რატიშვილი, ნოდარ ხუციშვილი, დათო დვალიშვილი, გივი სიხარულიძე…

ფილმი ეროვნული კინოცენტრის და კულტურის სამინისტროს ფინანსური მხარდაჭერით გამოვა ეკრანზე.

რეჟისორმა მადლობა გადაუხადა ოზურგეთის თეატრის სამხატვრო ხელმძღვანელს ვასილ ჩიგოგიძეს, დირექტორ ზაზა ჯინჭარაძეს ყურადღებისათვის, მსახიობებს, სტუდიელებს ეპიზოდურ როლებში მონაწილეობისათვის.

ფილმი მომავალი წლის ბოლოს გამოვა ეკრანზე.

მსგავსი სტატიები