აშენდება თუ არა ცემენტის ქარხანა ოზურგეთში

ოზურგეთს და ოზურგეთელებს კარგად ახსოვს ტოქსიკური წარმოების წინააღმდეგ გამართული საპროტესტო აქციები, რომელიც ინდური კომპანიის მიერ ექადიის ტერიტორიაზე, მდინარე აჭისწყლის მიმდებარედ  ჯერ ტყვიის  და შემდეგ ალუმინის გადამამუშავებელ საწარმოს მოწყობას უკავშირდებოდა. მოსახლეობის, არასამთავრობო სექტორის  ხანგრძლივ პროტესტს, სპეციალისტების რჩევებს შედეგი მოჰყვა. მოსახლეობა არ დაპირისპირებია ადგილობრივ ხელისუფლებას, პირიქით, მათგან გვერდში დგომას ითხოვდა და შედეგსაც მიაღწია. რეგიონის და მუნიციპალიტეტის ხელმძღვანელებმა მოსახლეობას თანადგომა გამოუცხადეს და ოზურგეთმა  აიცილა ტოქსიკური საწარმოების საფრთხე.

მუნიციპალიტეტის ტერიტორიაზე არის რამდენიმე ასფალტის და ბეტონის საწარმო, რომელთა მიმართ მოსახლეობის დამოკიდებულება არაერთგვაროვანია. მოსახლეობის  ნაწილი თვლის, რომ ასეთ საწარმოებს (მცირე გამონაკლისის გარდა) არ აქვთ მავნე გამონაბოლქვების დამჭერი ფილტრები და ასეთი ჰაერის ყოველდღიური ჩასუნთქვა არასასაურველია და მავნებელია მათთვის.

ქ. ოზურგეთის ექადია-ბასრის, სოფელ მაკვანეთის (შატოულა), წითელმთის, ლიხაურის (კვაჭალათი)  მოსახლეობა რამდენიმე წელია აპროტესტებდა  კვაჭალათის ტერიტორიაზე „ბლექსი ჯგუფის“(შემდეგ მეპატრონე შეიცვალა), ასფალტის წარმოებისას ჰაერში მავნე ნაწილაკების კონცენტრაციას და ძლიერ გამონაბოლქვს. ამჟამად აქ ასფალტის წარმოება შეჩერებულია.

დასახელებული უბნების (არა მარტო მათ) ახალი თავსატეხი გამოუჩნდა. შპს „ბეთლემი 2008“ ასფალტის ქარხნიდან ახლოს, სოფელ ლიხაურის ტერიტორიაზე ცემენტის საწარმოს მოწყობა-ექსპლოატაციას გეგმავს.

საქართველოს გარემოს დაცვისა და სოფლის მეურნეობის სამინისტროს სსიპ გარემოსდაცვითი ინფორმაციისა და განათლების ცენტრი აქვეყნებს დაგეგმილი საქმიანობის სკოპინგის ანგარიშს, რომლის განხილვა 2 დეკემბერს, 14 საათზე უნდა გაიმართოს სოფელ ლიხაურის ადმინისტარციული ერთეულის შენობაში.

_ ძალიან გასაკვირია, თუ რატომ გადაწყვიტეს ოზურგეთის მუნიციპალიტეტის მჭიდროდ დასახლებულ ტერიტორიაზე, ტურისტულ ზონაში ცემენტის ქარხნის მშენებლობა. ეს არის საწარმო რომელიც მავნე ზეგავლენას ახდენს გარემოზე და სასტიკად აბინძურებს ჰაერს. კონკრეტული საპრიექტო არეალი მდებარეობს სოფელ ლიხაურში, მავნე გავლენა ექნება ექადიის დასახლებასა და ასევე მიმდებარე სოფელ მაკვანეთზეც. რაც არ უნდა დაჭიკჭიკებული ჰქონდეთ პროექტში ფილტრების საკითხი, მონიტორინგის საკითხი ეჭვქვეშაა, რადგან ამის მწარე გამოცდილება არსებობს ქ. რუსთავში, კასპში. კონკრეტულ არეალში დაუშვებლად მიგვაჩნია მსგავსი საწარმოს მშენებლობა _ გვითხრა გარემოსდაცვითი ორგანიზაცია „ეკოს“ დამფუძნებელმა, ლიხაურელმა ირმა გორდელაძემ.

გაზეთი „ალიონი“ ერთ-ერთ სპეციალისტს, (პროფესიით ექიმი, გვთხოვა  ვინაობა არ დაგვესახელებია)  ესაუბრა:

_ რა თქმა უნდა დაბინძურებული ჰაერის ყოველდღიური ჩასუნთქვა არასასურველი და მავნებელია. საწარმოს მუშაობისას ატმოსფერულ ჰაერში გამოიფრქვევა 16 დასახელების მავნე ნივთიერება, მათ შორის: კადმიუმი Cd, სპილენძი Cu, ნიკელი Ni, ვერცხლისწყალი Hg, ტყვია Pb, ქრომი Cr, თუთია Zn, აზოტის დიოქსიდი, დარიშხანი,სელენი,გოგირდის დიოქსინი, გოგირდწყალბადი,  ნახშირბადის ოქსინი, ნაჯერი ნახშირწყალბადების მძიმე ფრაქცია, ცემენტის მტვერი, აირადი ფტორიდები, შეწოვილი ნაწილაკები და ა.შ. ეს რა თქმა უნდა მავნებელია როგორც თვით ქარხნის ტერიტორიაზე მყოფნა, ისე მიმდებარე ტერიტორიებზე.სასუნთქი გზების პათოლოგიები ცემენტის წარმოებაში მომუშავეთა პროფესიულ დაავადებებს შორის ყველაზე ფართოდ გავრცელებულ და განსაკუთრებულად მნიშვნელოვან ჯგუფს ქმნის.

რესპირატორულ ანუ სასუნთქი გზების დაავადებებს შორის ყველაზე ფართოდ გავრცელებული ქრონიკული ბრონქიტი ხშირად ფილტვების ემფიზემასთან ასოცირდება.

ემფიზემა ფილტვის მოცულობის პათოლოგიური გაგანიერებაა მასში ჰაერის დაგროვების გამო.

თუ საიდან მოიტანენ ცემენტის წარმოებისთვის საჭირო ნედლეულს, როგორი იქნება წარმოება თუკი მოსახლეობის თანხმობას მიიღებენ, ამაზე უახლოეს ხანში გაეცნობით.

გაზეთი „ალიონი“ #19, 26 ნოემბერი, 2024 წ.

მსგავსი სტატიები