ხმაური ოზურგეთის საკრებულოში _ოპოციზიონერმა დეპუტატებმა „ქართული ოცნების“ დეპუტატებს ე.წ. „სირცხვილის კორიდორი“ მოუწყვეს

დღეს, ოზურგეთის მუნიციპალიტეტის საკრებულოში ხმაური იყო. სხდომის დაწყების წინ ოპოზიციონერმა დეპუტატებმა უმრავლესობის წევრებს  ე.წ. „სირცხვილის კორიდორი“ მოუწყვეს. მათ ადგილზე თბილისში აქციებზე დაშავებული ადამიანების ფოტოები მიიტანეს და სხდომაზე მიმავალ დეპუტატებს თავიანთი პოზიციის დაფიქსირებას სთხოვდნენ.

ოპოზიციის ამ პერფორმანსს „ქართული ოცნების“ დეპუტატების გაღიზიანება მოჰყვა, რის გამოც ისინი ერთმანეთს სიტყვიერად დაუპირისპირდნენ. განსაკუთრებულად გამოიკვეთა ფრაქცია „ქართული ოცნება-დემოკრატიული საქართველოს“ და „ერთიანი ნაციონალური მოძრაობის“ თავმჯდომარეების მარიკა ჩხიკვიშვილის და დავით მჟავანაძის დაპირისპირება.

_„იმის პარალელურად, როცა ათობით ადამიანი დაასახიჩრეს, სიკვდილამდე მიიყვანეს, ქუჩებში მოუწყვეს რეპრესიები, ამის ფონზე დღეს ოზურგეთის საკრებულო და ავთანდილ თალაკვაძე აქ, საბჭოურ დარბაზში შეიკრიბნენ და საკუთარ თავს ხელფასებს უზრდიან. 6-7-8 ათასი ლარი უნდა ჰქონდეთ მათ ხელფასი, რომ ხმა არ ამოიღონ და გაუმაგრონ ზურგი ამ ძალადობრივ რეჟიმს“, _ განაცხადა პარტია„ნაციონალური მოძრაობის“ პოლიტსაბჭოს თავმჯდომარის მოადგილე  თათია ნიკოლაშვილმა.

მოგვიანებით ოპოზიციონერი დეპუტატები სხდომაზე ფოტოებით შევიდნენ, რის გამოც დაპირისპირება უმრავლესობის წევრებთან სხდომის დარბაზში გაგრძელდა. ადგილზე პოლიციის გამოძახება გახდა საჭირო. სამართალდამცავებმა ოპოზიციონერი დეპუტატები დარბაზიდან გაიყვანეს.

საკრებულოს სხდომა გაგრძელდა. დეპუტატებმა ოზურგეთის მუნიციპალიტეტის 2024 წლის ბიუჯეტი დაამტკიცეს.

_ნაციონალ დეპუტატებს არ აინტერსებთ რა ხდება საკრებულოში, როგორ მივიღეთ ბიუჯეტი, მხოლოდ საკრებულოს სხდომის ჩატარების ხელშეშლასა და დებოშზე არიან გადასულნი. კარგად ხვდება საზოგადოება, ვინ არიან ესენი და რას აკეთებენ. არაფერი არ უყვართ, ყველაფერს ცალმხრივად უდგებიან. არ ამბობენ მოქალაქეების გარდა, რამდენი პოლიციელი დაშავდა. ესენი არ უნდა იყვნენ საკრებულოში _განაცხადა თავის გამოსვლაში საკრებულოს თავმჯდომარე დავით დარჩიამ.

მსგავსი სტატიები