ვალერიან (ვოვა) ცანავა იუბილარია!

ვალერიან ცანავა დაიბადა 1935 წელს ქ. სოხუმში, 1953 წელს დაამთავრა სოხუმის #1 საშუალო სკოლა და ჩაირიცხა საქართველოს სასოფლო-სამეურნეო ინსტიტუტში, რომელიც 1958 წელს დაასრულა აგროქიმია – ნიადაგმცოდნეობის სპეციალობით. ინსტიტუტის დამთავრების შემდეგ იგი სამუშაოდ გაიგზავნა ანასეულში, ჩაისა და სუბტროპიკული კულტურების სამეცნიერო – კვლევით ინსტიტუტში. 1961-1964 წლებში ვ. ცანავამ გაიარა ასპირანტურაში სწავლების სრული კურსი სასუქებისა და ინსექტოფუნგიციდების სამეცნიერო – კვლევით ინსტიტუტში (ქ. მოსკოვი) 1966 წელს წარმატებით დაიცვა საკანდიდატო დისერტაცია, დაბრუნდა ანასეულში და საქმიანობა გააგრძელა მშობლიურ ინსტიტუტში უფროსი მეცნიერი თანამშრომლის (1966-1972), სამეცნიეო დარგში დირექტორის მოადგილის (1972-1995), გენერალური დირექტორის (1995-2006), სამეცნიერო საბჭოს თავმჯდომარის (2006-2011) და აგროქიმია-ნიადაგმცოდნეობის ლაბორატორიის ხელმძღვანლის (2011-დან) პოზიციებზე.

1988 წელს წარმატებით დაიცვა სადოქტორო დისერტაცია სოფლის მეურნეობის მეცნიერებათა დოქტორის სამეცნიერო ხარისხის მოსაპოვებლად თემაზე „ჩაის მცენარის აზოტოვანი კვების აგროქიმიური საფუძვლები“. ვალერიან ცანავა 1992 წელიდან საქართველოს სოფლის მეურნეობის მეცნიერებათა აკადემიის წევრ-კორესპოდენტია, ხოლო 1995 წლიდან – აკადემიის ნამდვილი წევრი. იგი არის საქართველოს სოფლის მეურნეობის მეცნიერებათა აკადემიის პრეზიდიუმის და სამეცნიერო ჟურნალის „მოამბე“ სარედაქციო საბჭოს წევრი.

მნიშვნელოვანია ბატონი ვალერიანის წვლილი ქართული მეცნიერების და სუბტროპიკული სოფლის მეურნეობის განვითარებაში. იგი ავტორია 215 სამეცნიერო ნაშრომის , მათ შორის, 3 მონოგრაფიის, 1 სახელმძღვანელოს, 1 პრაქტიკული სახელმძღვანელოს, 6 გამოგონების და პატენტის. მონაწილეა რიგი საერთაშორისო და ადგილობრივი სამეცნიერო პროგრამების და პროექტების.

განსაკუთრებით აღსანიშნავია მონოგრაფიები: „ჩაის მცენარის აზოტით კვების აგროქიმიური საფუძვლები“ (1985 წ.) და თანაავტორობით (მ. დარასელია, ი. ვორონცოვი, ვ. გვასალია) გამოცემული. „საბჭოთა კავშირის მეჩაიეობა“ (1988).

დიდია ვალერიან ცანავას წვლილი სამეცნიერო კადრების მომზადების საქმეში. მისი ხელმძღვანელობით მომზადებული და დაცულია ორ ათეულამდე სამაგისტრო, საკანდიდატო და სადოქტორო ნაშრომები.

ამაგდარი მეცნიერი წარმატებით აგრძელებს საქმიანობას ნიადაგის ნაყოფიერების დონის შესწავლის და განოყიერების დიფერენცირებული სისიტემის შემუშავების მიმართულებით. მნიშვნელოვანია ბოლო წლებში, კოლეგებთან ერთად, ჩვეული ენთუზიაზმით.შეასრულებული სამუშაოები – სასოფლო-სამეურნეო კულტურების ქვეშ ახალი სახის კომპლექსური სასუქების გამოყენების ეეფექტიანობის შესწავლისა და კვლევის შედეგების საცდელი დანერგვის მიმართულებით.

მეგობრები და კოლეგები დიდი სიყვარულით და პატივისცემით ვულოცავთ ღვაწლმოსილ მეცნიერს ბატონ ვალერიან ცანავას 90 – წლის საიუბილეო თარიღს და ვუსურვებთ ჯანმრთელობას, დღეგრძელობას, მხნეობას, სიხარულს და მომავალ წარმატებებს.