ოზურგეთის ღია პირველობა ჩოგბურთში დასრულდა

ოზურგეთის მოსწავლეთა ღია პირველობა ჩოგბურთში დასრულდა. გამარჯვებულები გამოვლინდნენ და ისინი ოზურგეთის სპორტულ-გამაჯანსაღებელ დაწესებულებათა გაერთიანების უფროსმა კობა ბალავინოვმა შესაბამისი სინჯის მედლებით, თასებით და სიგელებით დააჯილდოვა.

_წელს პირველად ჩავატარეთ ოზურგეთის მოსწავლეთა ღია პირველობა ჩოგბურში მოსწავლეთა შორის 5 ასაკობრივ ჯგუფში. ტურნირი 12 დღე გაგრძელდა და მასში 40 ბავშვმა მიიღო მონაწილეობა _გვითხრა მწვრთნელმა დავით თავართქილაძემ და მანვე გამარჯვებულები დაგვისახელა:

5-8 წლის ასაკში მარიამ კოპალიანმა ფინალურ მატჩში მართა ჭელიძე დაამარცხა:

შერეულ წყვილში ნინა გოგიაშვილმა _ ლუკა ჩავლეშვილი;

10-12 წლის ასაკშიც ნინა გოგიაშვილმა გაიმარჯვა. მან ფინალში ქრისტინე სალუქვაძეს სძლია;

14-16 წლის ჩოგბურთელებს შორის ანასტასია ნემსაძემ თამარ რუსიეშვილი დაამარცხა.

დავით თავართქილაძის თქმით გამარჯვებული სპორტსმენები ბათუმში, აჭარის ღია პირველობაზე მიიღებენ მონაწილეობას. ეს ტურნირი 8-13 მაისს გაიმართება.

ჩოგბურთელები ტურნირისთვის დავით თავართქილაძის გარდა გივი სიამაშვილმა და მამუკა კილაძემ მოამზადეს.

დავით თავართქილაძე მარტის დასაწყისიდან ერთი თვე ეგვიპტეში, შარმ ელ შეიხში იმყოფებოდა, სადაც იგი ერთ-ერთი რეიტინგული ქართველი ჩოგბურთელის სერგო სიხარულიძის მწვრთნელად იყო.

დავით თავართქილაძის თქმით, მისმა შეგირდმა იქ 4-ჩელენჯერ ტურნირში მიიღო მონაწილეობა, საიდანაც 2-ჯერ ძირითად ძალებში გავიდა.

მსგავსი სტატიები