დღეს პოლონეთშისამი მეფის დღე (Trzech Króli) აღინიშნება

სადღესასწაულო დილა ტაძრებში საზეიმო მესით იწყება, სადაც მღვდელი საკმეველს, წყალსა და ცარცს აკურთხებს; მრწამსის თანახმად, ამ ნივთებს სახლში მშვიდობა და კურთხევა მოაქვთ, ამიტომ მორწმუნეებს ისინი საკუთარ საცხოვრებელში მიაქვთ და ტრადიციულ რიტუალს ასრულებენ. კერძოდ, ნაკურთხი ცარცით სახლის კარის ზედა ჩარჩოზე წერენ ფორმულას – 20 + K + M + B + 26, რაც ერთი მხრივ მოგვების სახელებს უკავშირდება, ხოლო მეორე მხრივ ლათინურ დალოცვას Christus Mansionem Benedicat (ქრისტემ დალოცოს ეს სახლი) განასახიერებს.

დღესასწაულის ყველაზე მასშტაბური და სანახაობრივი ნაწილია სამი მეფის მსვლელობა, რომელიც პოლონეთის მრავალ ქალაქში, მათ შორის ვარშავაში, კრაკოვში, პოზნანსა და ვროცლავში იმართება. ფერადოვან კარნავალში, რომელიც ბიბლიურ სცენებს აცოცხლებს, მონაწილეობას იღებენ ბავშვები და ოჯახები, რომლებიც მეფეების, ანგელოზებისა და მწყემსების კოსტიუმებში არიან გამოწყობილნი და ქუჩებში საშობაო ჰიმნების თანხლებით გადაადგილდებიან.

გარდა საჯარო ღონისძიებებისა, დღესასწაულს გამოკვეთილი ოჯახური ხასიათიც აქვს: ზოგიერთ რეგიონში სპეციალურ ნამცხვარს აცხობენ, ბევრი პოლონელისთვის კი სწორედ 6 იანვარია ის სიმბოლური ზღვარი, როდესაც საშობაო დეკორაციებსა და ნაძვის ხეს ალაგებენ, თუმცა ეკლესიური ტრადიციით ეს პერიოდი ზოგჯერ 2 თებერვლამდეც გრძელდება. ვინაიდან 6 იანვარი სახელმწიფო დასვენების დღეა, ქვეყანაში არ მუშაობს საჯარო დაწესებულებები, სკოლები და მაღაზიების უმეტესობა, რაც მოსახლეობას საშუალებას აძლევს, სრულად ჩაერთოს რელიგიური და ეროვნული იდენტობის ამ მნიშვნელოვან დღესასწაულში.