„ჯვარიმინდორის“ ფესტივალი სიმღერით „შემოქმედის ეკლესია“გაიხსნა

28 აგვისტოს, შუახევის მუნიციპალიტეტის ტერიტორიაზე, აჭარა-გურიის ალპური ზონის ისტორიულ გზასაყარზე, ფოლკლორული ფესტივალი „ჯვარიმინდორი“ გაიმართა.

ადგილობრივებმა ამ ტერიტორიას ჯვარიმინდორი უწოდეს იმ ჯვრის პატივსაცემად, რომელიც მე-18 საუკუნეში აჭარელმა ღვთისმსახურებმა დამპყრობლებისგან  გადამალეს და იხსნეს.

2012 წლიდან ყოველ 28 აგვისტოს, ღვთისმშობელი მარიამის მიძინების დღეს, ეწყობა  სახალხო დღესასწაული ,,ჯვარიმინდორობა“. ფესტივალზე იმართება ადგილობრივი ფოლკლორული ანსამბლების შოუ, წარმოდგენილია ხელნაკეთი ნივთების გამოფენა-გაყიდვა, ეწყობა ხვადასხვა სპორტული შეჯიბრებები.

რამდენჯერმე ჯვარიმინდორის დღესასწაულზე უამრავ ქართველ და უცხოელ სტუმრებს თავისი ხელოვნება აჩვენა ოზურგეთის კულტურისა და მოსწავლე-ახალგაზრდობის ცენტრთან არსებულმა ცნობილმა ფოლკლორულმა ანსამბლმა „იადონმა“ (ხელმძღვანელი ბიძინა მჟავია).

ამჯერად ფესტივალი ანსამბლ „ჭვანას“ სიმღერით „შემოქმედის ეკლესია“ გაიხსნა.

ფესტივალის მონაწილეებსა და სტუმრებს სიტყვით მიმართა და დღესასწაული მიულოცა შუახევის მუნიციპალიტეტის მერმა ომარ ტაკიძემ.

ფესტივალი კონცერტით გაგრძელდა, რომელშიც უხუცესთა ანსამბლი ,,ფესვები”,ანსამბლი „მარეთი“,ფოლკლორული ანსამბლი ,,ნაი“,ანსამბლი „ჭვანა“, შუახევის ხელოვნებისა და მოსწავლე ახალგაზრდობის სკოლის ბენდი და მოწვეული მომღერალი სოფო ბედია მონაწილეობდნენ.

შუახევის მუნიციპალიტეტისა და ჭვანის ხეობის განვითარებაში შეტანილი განსაკუთრებული წვლილისთვის შვიდ მოქალაქეს „საპატიო ჭვანელის“ წოდება მიენიჭა.

გაზეთ „ალიონთან“საქართველოს პარლამენტის წევრმა ანზორ ბოლქვაძემ აღნიშნა, რომ ფოლკლორული ფესტივალი „ჯვარიმინდორი“ 2012 წელს, შუახევის მუნიციპალიტეტის მერიის მხარდაჭერითა და „საზოგადოება ჭვანელის“ ინიციატივით დაფუძნდა. მისი მიზანია ადგილობრივი კულტურისა და ფოლკლორის, ასევე სამთო ტურიზმის პოპულარიზაცია და განვითარება.

(უფრო ვრცლად იხილეთ გაზეთ „ალიონის“ 31 აგვისტოს ნომერში).

მსგავსი სტატიები