ყველა ადამიანური ღირსებით შემკული მეცენატი

2020 წლის გიორგობა დღე იყო. ქვეყანაში კოვიდი მძვინვარებდა. ასეთ მძიმე სიტუაციაშიც კი, მუზეუმში მობრძანებული ოზურგეთის მუნიციპალიტეტის მაშინდელი მერი, ბატონი კოტე შარაშენიძე ნასაკირალის ბრძოლის მასალებით დაინტერესდა. მასთან ერთად იმყოფებოდა ახალგაზრდა, სიმპათიური კაცი, რომლის ვინაობა მაშინ არ ვიცოდი. მერი და სტუმარი ცხავათის მუზეუმის რეაბილიტაციის საკითხზეც ბჭობდნენ. შესაბამისი მასალების გაცნობის შემდეგ, საუბარი გადავიდა გურიის უკანასკნელი მთავრის მამია V გურიელისა და მისი ოჯახის ტრაგიკულ ბედზე. იმხანად ვაგროვებდი მასალებს მამია გურიელის უფროსი ქალიშვილის ეკატერინე გურიელის მარტვილობის შესახებ. სტუმარი მეკითხება, ეკატერინე გურიელის ფოტო თუ გაქვთო? ფოტო არ არსებობს-მეთქი, ვუპასუხე და იქვე მხატვარ თამაზ დარჩიას მიერ შესრულებული „ეკატერინე გურიელის პორტრეტი“ ვაჩვენე,  ჩემი კვლევის მასალებიც გავაცანი. დავბეჭდოთო, მეუბნება ტელეფონის ნომერს მიტოვებს, სამ დღეში თბილისში ვიქნებიო.

გაოცებული დავრჩი. იქვე გავიგე, რომ ეს ახალგაზრდა კაცი გახლდათ დღეს უკვე ყველასათვის კარგად ცნობილი პიროვნება, ვანო ნაკაიძე. სიტყვას საქმე მოჰყვა და ბატონი ვანოს ფინანსური დახმარებით დაიბეჭდა „ეკატერინე გურიელის მარტვილობა“. მისივე დაფინანსებით, მკითხველი მალე მიიღებს წიგნს „გურიის ახალი დიდგორი“.

ოზურგეთის საზოგადოებრიობამ კარგად იცის ქვედა ბახვის წმინდა მარინეს ეკლესიის ხელახლა აღმშენებლების ნაკაიძეების ოჯახისა და ამ ეკლესიის მოძღვრის მამა იოსების (ნაკაიძე) შესახებ.

ყოველი წლის 30 ივლისს წმინდა მარინეს დღესასწაულზე აქ, ადგილობრივი მრევლის გარდა, უამრავი მომლოცველი მოდის ოზურგეთიდან, რა თქმა უნდა, ბატონი ვანოც ჩამოდის ოჯახის სრული შემადგენლობით. სადღესასწაულო წირვის შემდეგ, ეზოში იმართება დიდი ტრაპეზი. ხალხი ბატონი ვანოსა და მისი ტყუპისცალი ძმის სერგის ირგვლივ ტრიალებს. ძმებიც უყურადღებოდ არავის ტოვებენ.

წლეულს ჩემს ახლობლებს, ზურა და მაია გობრონიძეებს ძალიან გაუმართლათ, მათი შვილი გიორგი საოპერო მომღერალთა კონკურსის ნახევარფინალში გავიდა, მაგრამ ოჯახს იტალიაში შვილის გასამგზავრებელი თანხა არ ჰქონდა. თხოვეს ბატონ ვანოს, რომელსაც არც კი იცნობდნენ და რომელმაც პრობლემა მყისიერად გადაჭრა. რაღა თქმა უნდა, ზურა და მაია გობრონიძეები უსაზღვრო მადლიერებას გამოხატავენ ბატონი ვანოს მისამართით.

ბატონი ვანო პერნამენტულად ეხმარება რიგით ადამიანებს, სტუდენტებს სწავლის საფასურის დაფარვაში. უკვე ცნობილი მეცენატი გარკვეული რაოდენობის თანხას უტოვებს მამა იოსებს შეჭირვებული ადამიანების დასახმარებლად. ეს, რაც მე ვიცი ჩემი ნაცნობებისგან და რაც არ ვიცი, ის ღმერთმა იცის.

არის ასეთი გამოთქმა: „თუ  მათხოვრები აგეკიდნენ, ესე იგი ღვთის წყალობა აგეკიდა“, მეც ამ „მათხოვრებში“ გავდივარ.

ოზურგეთის საზოგადოებრიობას არასდროს დაავიწყდება წლევანდელი 28 ივლისი. ამ დღეს ოზურგეთში, „ჭადრების ბაღში“ გაიხსნა გურიის პრეზიდენტის ბენია ჩხიკვიშვილის ბიუსტი, რასაც დიდი ხანი ველოდით. თუ არ მეშლება, იგი 2021 წელს უნდა დადგმულიყო, მაგრამ რატომღაც გადაიდო. იმ დღეს ოზურგეთში დილიდანვე გადაუღებლად წვიმდა, არადა, ქალაქი მრავალ საპატიო სტუმარს ელოდა დედაქალაქიდან, ბევრი საინტერესო ღონისძიებაც იყო დაგეგმილი, დავასახელებ ერთ-ერთს, ზაზა ფაჩულიას სახელობის საკალათბურთო მოედნის გახსნას.

15 საათისთვის ხალხი თეატრისკენ დაიძრა, მათ შორის ვიყავით მუზეუმელები. წინა დღით შეხვედრა გვქონდა კინორეჟისორთან, მწერალთან და მკვლევართან, ბატონ ირაკლი მახარაძესთან, რომელიც გვესაუბრა ბენია ჩხიკვიშვილზე და მიგვიწვია თეატრში ამ თემაზე მის მიერ შექმნილი ფილმის ჩვენებაზე. თეატრში მისულებს კი სიურპრიზი გველოდა: პარტერსა და იარუსებზე სტუმრებისათვის ყველა სკამზე იდო ჩანთა ბენია ჩხიკვიშვილის პორტრეტით, ჩანთაში იდო წიგნი ბენიას შესახებ, მაისური და ფინჯანი ბენიას გამოსახულებით.

აკადემიურ დონეზე ჩატარებული ღონისძიების შემდეგ, ქალბატონი ნატო მეტონიძისა და ჩვენი „შვიდკაცას“ სიმღერის ფონზე, საზეიმოდ გაიხსნა ბენია ჩხიკვიშვილის ბიუსტი. მე იმ დღეს ვნახე წვიმისაგან გალუმპული ბედნიერი გურულები, რომელთაც ღონისძიების დამთავრებამდე „ჭადრების ბაღიდან“ ფეხი არ მოუცლიათ.

ამ ბიუსტისა და მისი ავტორის, ამ ღონისძიების იდეის შესახებ, ალბათ, სპეციალისტები დაწერენ. მე მხოლოდ ვიცი, რომ ყველაფერი ეს დააფინანსა კომპანია „გალფმა“ და მისმა დირექტორმა, ბატონმა ვანო ნაკაიძემ. ისიც ვიცი, რომ ქართველ ცნობილ მეცენატთა სახელებს შეემატა ვანო ნაკაიძის სახელი.

ღმერთმა უმრავლოს ოზურგეთს, გურიასა და სრულიად საქართველოს ყველა ადამიანური ღირსებით შემკული, ბატონი ვანო ნაკაიძისთანა ადამიანები.

მანანა ლომაძე,

ოზურგეთის ისტორიული მუზეუმის ფონდების მცველი

გაზეთი „ალიონი“, #24, 30 ოქტომბერი, 2023 წ.

სურათზე: ქვედა ბახვის წმინდა მარინეს სახელობის ეკლესიის პროექტის წარდგენა მის უწმინდებობასთან საქართველოს კათოლიკოს-პატრიარქთან ილია მეორესთან.

მსგავსი სტატიები