ოზურგეთის მუნიციპალიტეტის სოფელ ქვემო ნატანების საჯარო სკოლაში ჭერის ნაწილი ჩამოიშალა. შემთხვევა დღეს შუადღის საათებში, მაშინ მოხდა, როცა სკოლაში საგაკვეთილო პროცესი მიმდინარეობდა. შემთხვევის შედეგად დაშავდა ორი ადამიანი, მათგან ერთ-ერთი მშობელია, რომელმაც მსუბუქი დაზიანება მიიღო, ხოლო სკოლის დამლაგებელი უგონო მდგომარეობაში ქობულეთის სამედიცინო კლინიკაში გადაიყვანეს.
მომხდარზე საქმე აღძრულია სსკ-ის 124–ე მუხლით, რაც გულისხმობს ჯანმრთელობის ნაკლებად მძიმე ან მძიმე დაზიანებას გაუფრთხილებლობით.
სოფელ ქვემო ნატანების საჯარო სკოლაში ორ ცვლად მიმდინარეობს სწავლება, რადგან ნატანების #1 საჯარო სკოლა ავარიულ მდგომარეობაშია და ექსპერტების დასკვნით იქ სწავლება არ შეიძლება. ზემო ნატანებში სკოლის ახალი შენობა უნდა აშენდეს.
