ლანჩხუთელი ნინო გუნია _„ნანა ალექსანდრიას თასი-2024“_ ქალთა შორის ერთპიროვნული გამარჯვებული

ქ.ფოთში დამთავრდა საერთაშორისო ტრადიციული საჭადრაკო ტურნირი „ნანა ალექსანდრიას თასი-2024“ , რომელშიც 26 ქვეყნის ქვეყნის 450 მოჭადრაკე მონაწილეობდა. წელს ტურნირმა განსაკუთრებით ძლიერ შემადგენლობას მოუყარა თავი, რაც მეტწილად განპირობებული იყო მნიშვნელოვნად გაზრდილი საპრიზო ფონდით (60 000 ლარი!). ღია A ტურნირში ჩართულ 50 მონაწილეს შორის 10 დიდოსტატი და 17 საერთაშორისო ოსტატი იბრძოდა პირველ ათეულში მოსახვედრად, სადაც საპრიზო ჯილდო თანმიმდევრულად, 700 -დან 10 ათას ლარს შეადგენდა.არანაკლებ სოლიდური იყო საპრიზო ფონდი სხვა, რეიტინგული ͌და ასაკობრივი მაჩვენებლებით რანგირებულ ნომინაციებში.

სასიხარულოა,რომ ტურნირში წარმოდგენილ 100-ზე მეტ უცხოელ მოჭადრაკეებს შორის ყველაზე მაღალი ადგილები და შესაბამისი პრიზები, ქართველმა მოჭადრაკეებმა აიღეს.

ლანჩხუთელი და ოზურგეთელი მოჭადრაკეების წარმომადგენლობით, ტურნირში გურიის რეგიონიდან 17 მოჭადრაკე მონაწილეობდა. ყველაზე კარგი შედეგი open D ტურნირში მოასპარეზე ლანჩხუთელმა ნინო გუნიამ აჩვენა. მან 70 მონაწილეს შორის, ოთხ ვაჟთან ერთად 7-7 ქულით I- IV ადგილები გაიყო და ამავე მაჩვენებლით ქალთა შორის ერთპიროვნულად გაიმარჯვა. ურიგოდ არ უასპარეზიათ სხვებსაც, თუმცა მეტს მოველოდით, შესაძლოა მოკრძალებულ შედეგებზე იმანაც იმოქმედა, რომ თითოეულს 35 გრადუსიან სიცხეში ყოველდღიურად უხდებოდა 100 კმ გზის გავლა და ასპარეზობა.

ჩვენი მოჭადრაკეებიდან 7 -მა მაინც შეძლო რეიტინგის მატებით დაემთავრებინა ტურნირი. ესენია: ლანჩხუთიდან-ნინო გუნია +56, ანასტასია კვირკველია +36, ლილე ფირცხალაიშვილი +30, მიხეილ აფხაზავა +7. ოზურგეთიდან- ლუკა მახარაძე +10, ლაზარე ჩხარტიშვილი +7 და თორნიკე მახარაძე (9-დან 6,5 ქულა).

გურიის მოჭადრაკეები, ივლის- აგვისტოში დაგეგმილ რამდენიმე რესპუბლიკურ და საერთაშორისო ტურნირშიც მიიღებენ მონაწილეობას.

წარმატებები ვუსურვოთ მათ.