რა ხდება აკეთში და რატომ იცვლის კალაპოტს პერიოდულად მდინარე სუფსა

დღეს, ლანჩხუთის მუნიციპალიტეტის სოფელ აკეთში, მდინარე სუფსის სანაპიროსთან, ხალხმრავალი აქცია გაიამართა. აქციის მონაწილეები კომპანია „ახალი ქარხანა“ მიერ მდინარე სუფსის აუზში ინერტული მასალის კანონდარღვევით ამოღებას აპროტესტებდნენ.

აკეთელები ამბობდნენ, რომ ინერტული მასალების არასწორი მოპოვების გამო მდინარემ საყანე ფართობები მიიტაცა, ასევე გაანადგურა მდინარისპირა საძოვრები, რომლითაც ამ სოფლის მაცხოვრებელთა პირუტყვი სარგებლობდა, ჭებში დაშრა წყლები, კარიერის ზემოთ, სუფსის შენაკადის,მდინარე აცაურას კალაპოტი იცვლება. დაინგრა ხიდიც. დაწყებულია მეწყერული პროცესები. თუ ასე გაგრძელდა, ეკოლოგიური კატასტროფა გარდაუვალი იქნება.

მოსახლეობა გულახდილად საუბრობდა მედიასთან თავის გასაჭირზე და არაერთი კომენტარი ჩავწერეთ.

_ 3 ვაჟის დედა ვარ. უფროსი 12 წლისაა. დღე და ღამ ვშრომობთ . 7 სული მსხვილფეხა პირუტყვი გვყავს. შარშან 0,7 ჰექტარ სიმინსდის ფართობში ძალიან მცირე მოსავალი მივიღეთ. პირუტყვს ფაქტიურად საძოვარი აღარ აქვს. მდინარის გაღმა რომ გავიდეს, შესაძლოა ექსკავატორების მიერ ამოღებულ ჭაში ჩავარდეს და დაიხრჩოს. მუდამ ბაგურ კვებზე ხომ არ გვეყოლება პირუტყვი. შემოსავლის გარეშე სოფელში რა გვინდა. ისედაც სანახევროდ დაცარიელებულია აქაური სოფლები და როცა გაიზრდებიან, რა ვუთხრა ჩვენს შვილებს, სოფელში დარჩი და ასეთ პირობებში იცხოვრეო. ესაა მრავალშვილიანი ოჯახების დახმარება? _გვითხრა ლელა გოგრიჭიანმა.

_ აქაური ვარ. პროფესიით ჰიდროქიმიკოსი. წლების მანძილზე ვმუშაობდი ქ. ბათუმში გარემოს დაცვის ინსპექციაში ჩემი სპეციალობის მიხედვით. ძალიან ცუდი მდგომარეობაა სუფსის ხეობაში. ინერტულ მასალას მდინარის აუზში წესების დარღვევით  დასაშვებზე გაცილებით მეტ სიღრმეზე იღებენ. სველი ქვიშა მიაქვთ. ზიანდება ცენტრალური გზები. აკეთშიც საუბნო გზები სავალალო მდგომარეობაშია _გვითხრა ლაურა ქურიძემ.

ოთარ ხურციძის თქმით, არასწორია ადგილობრივი ხელისუფლების განცხადება, თითქოს სოფლის მოსახლეობამ თანხმობა განაცხადა სუფსის აუზში კარიერის გახსნაზე და ამიტომ ითხოვს  ადგილობრივი მუნიციპალიტეტიდან თუკი მსგავსი რამ არსებობს, წარმოადგინონ.

_ მდინარის აუზის მიმდებარე ფართობები სოფლის საძოვრები იყო და რატომ შეუცვალეს სტატუსი, საინტერესოა. კომპანია „ახალი ქარხანა“, რომელმაც ლიცენზია 2022 წლის თებერვალში მიიღო,  კანონდარღვევით ასრულებს ლიცენზიის პირობებს. პერიოდულად კალაპოტს უცვლის მდინარეს, საფრთხეს უქმნის დარჩენილ სავარგულებს.

ლიცენზიით მათ 2027 წლის ბოლომდე 120 ათასი კუბ. მეტრი ინერტული მასალა უნდა ამოიღონ, წლიურად ერთჯერადად დაახლოებით 20-25 ათასი კუბური მეტრი, მაგრამ მათ ინერტული მასალის უმეტესობა უკვე ამოიღეს. სოფელი ეკოლოგიური კატასტროფის წინაშე დგას _განაცხადა ოთარ ხურციძემ.

აქციაზე იმყოფებოდა საქართველოს ახალგაზრდა იურისტთა ასოციაციის ოზურგეთის ოფისის თავმჯდომარე თამაზ ტრაპაიძე, რომელიც იურიდიულ დახმარებას უწევს მოსახლეობას.

მსგავსი სტატიები