ზურაბ ცინცქილაძე 70 წლისაა

დღეს, 6 ივნისს, 70 წლის გახდა ცნობილი ქართველი მსახიობი, პოლიტიკოსი და საზოგადო მოღვაწე ზურაბ ცინცქილაძე – მემედ აბაშიძის სახელობის პრემიის ლაურეატი, ღირსების ორდენის კავალერი.

დაიბადა ბათუმში, 1952 წელს. 1973 წელს დაამთავრა შოთა რუსთაველის სახელობის თეატრალური ინსტიტუტის სამსახიობო ფაკულტეტი. 1973-1988 წლებში მუშაობდა „მეტეხის თეატრში“ 1977-2003 წლებში თეატრისა და კინოს სახელმწიფო უნივერსიტეტში კითხულობდა ლექციებს. 1996-2003 წლებში იყო ბათუმის ხელოვნების ინსტიტუტის პრორექტორი. ეროვნულო გმირის სახე შექმნა ფილმში „მევლუდი“ (ნ. სანიშვილი, 1985). მონაწილეობს ფილმებში: „თვალი პატიოსანი“ (შ. მანაგაძე, 1976), „სინქრონიზაცია“ (გ. მატარაძე, 1977), „სახლი ლესნაიაზე“ (ნ. სანიშვილი, 1980), „საფეხური“ (ა. რეხვიაშვილი, 1986), „ცხოვრება დონ კიხოტისა და სანჩოსი“ (რ. ჩხეიძე, 1989), „იქ ჩემთან“ (ზ. ხალვაში, 1990), „პრემიერა“ (გ. ლორთქიფანიძე, 1991), „სათნოებათა კიბე“ (ნ. წულაძე, 1997), „კიდევ ერთი ქართული ისტორია“ (ე. ბადურაშვილი, 2003), „სვანი“ (ს. ჯაჭვლიანი, 2007). მონაწილეობს ტელესერიალებში „გოგონა გარეუბნიდან“ და სხვა. გადაიღო დოკუმენტური ფილმები: „მემედ ბატონო“ და „ბათუმის ომი“ (ზ. ბუაძესთან ერთად, 1994). ზურაბ ცინცქილაძე 1995-1999 წლებში იყო პარლამენტის წევრი. არის თურქეთთთან მეგობრობის ასოციაციის დამფუძნებელი (2006), მანამდე კი, 1992 წელს, დააფუძნა კინოსტუდია „აჭარა“, იყო მისი სამხატვრო ხელმძღვანელი; 2000 წელს დააფუძნა საქართველოს ხელოვანთა ლიგა; 1996-2003 წლებში იყო საქართველოს თეატრალურ მოღვაწეთა აჭარის განყოფილების თავმჯდომარე. ამჟამად ოზურგეთის თეატრში მოღვაწეობს.

სხვათა შორის, ზურაბ ცინცქილაძე მხატვრული კითხვის დიდოსტატიცაა. კარგი თამადაც. გამორჩეულია გურულ-აჭარული იუმორით. კარგად იცის ისტორია. არის დიდებული მეოჯახე და ერთგულების სიმბოლო. მიაჩნია, რომ „სიყვარული არის სიბრძნე და გონიერება“. _წერს სოციალურ ქსელში ამირან ბუთურიშვილი.