ოზურგეთელი ლაზარე ჩხარტიშვილი _საქართველოს ვიცე-ჩემპიონი

ქ.ბათუმში დამთავრდა საქართველოს უმაღლესი ლიგის პირველობა ჭადრაკში 8,10,12,14, 16 და 18 წლამდე ასაკის გოგონებსა და ჭაბუკებს შორის, რომელშიც განსაკუთრებული მიღწევების მქონე 300-მდე მოჭადრაკე მონაწილეობდა. გურიის რეგიონიდან ჩემპიონატში სხვადასხვა ასაკის 20-მდე მონაწილე იყო ჩართული, რომლებმაც ეს უფლება I ლიგაში და რეგიონალურ პირველობებში მიღწეული წარმატებებისათვის მიიღეს. ჩემპიონატში ავტომატურად იყო ჩართული, ქვეყნის შარშანდელი ჩემპიონი, ოზურგეთელი ლაზარე ჩხარტიშვილი, რომელიც 42 თანატოლთან პაექრობაში, ბუნებრივად მხოლოდ უმაღლესი ადგილისათვის იბრძოდა. მან ამ ჩემპიონატში ბრწყინვალედ თამაშით აჩვენა, რომ სპორტული დონე შარშანდელთან შედარებით ბევრად მომატებული აქვს, რაც შემტევ, კომბინაციური შეწირვებით გაჯერებულ და ღრმად გააზრებულ პარტიებში გამოავლინა. ნათამაშები 9 პარტიიდან, მას მხოლოდ ერთ პარტიაში არ გაუმართლა , ისიც მთავარ მეტოქესთან-ზუგდიდელ ანდრია ჯახაიასთან, სადაც ბოლომდე ვერ გათვალა დაწყებული კომბინაცია და პარტიის დათმობა მოუწია. ეს ნაჩუქარი უპირატესობა ჯახაიამ ფინიშამდე შეინარჩუნა და 8 ქულით ჩემპიონიც გახდა. ლაზარე 7,5 ქულით ვიცე-ჩემპიონობას დასჯერდა, თუმცა, როგორც სპეციალისტები აღნიშნავენ, ლაზარეს გააზრებული კომბინაციური თამაშის სტილი, ამ ასაკში ძალზე იშვიათია.

გურიის წარმომადგენლებიდან დადებითი შედეგი (ქულების 50%-ზე მეტი) აჩვენეს ლანჩხუთელებმა მიხეილ აფხაზავამ (18 წლამდე ასაკის) თეკლა მშვიდობაძემ (12 წ,) და ლიკა კლდიაშვილმა (8 წ,), რომლებმაც 5-5 ქულით დაამთავრეს ჩემპიონატი. შესაძლო ქულების ნახევარი, ანუ 4,5-4,5 დააგროვეს ოზურგეთელებმა ანდრია ადეიშვილმა(8 წ.), მარიამ მახარაძემ(12 წ.) და.ლანჩხუთელმა ნინო გუნიამ916 წ).

ინფორმაციისათვის ავღნიშნავთ, რომ ლაზარე ჩხარტიშვილმა ვიცე- ჩემპიონობის მოპოვებით ევროპის 2025 წლის ჩემპიონატის დაფინანსებული საგზური მიიღო. ბუნებრივია მის ამ წარმატებას მოჰყვა ინდივ.რეიტინგის მნიშვნელოვანი მატებაც.

გურიის ჭადრაკის ფედერაციის თავმჯდომარე