„არა ძალადობას“ და ქსკ „ლანჩხუთის“ შეწყვეტილი მატჩი და განცხადება

დღეს ქალთა უმაღლესი ლიგის (ზედა ჯგუფი)  22-ე ტურში ქსკ „ლანჩხუთი“ ქსკ „ნიკე-ლუსოს“ მასპინძლობდა. მატჩი გვიმბალაურში იყო დანიშნული.

ამ მატჩის წინ „ნიკე ლუსოს“ 63, ხოლო „ლანჩხუთს“ 60 ქულა ჰქონდა.

.საქართველოს ქალთა ეროვნული ჩემპიონატის ამ უმნიშვნელოვანეს შეხვედრაში, რომელიც ჩემპიონის ბედს არკვევდა, მსაჯის სასტვენისა და ბურთის გათამაშებისთანავე ლანჩხუთელმა ფეხბურთელმა ბურთი მოედნის გარეთ გადააგდო, რის შემდეგაც გუნდმა თამაშის გაგრძელებაზე უარი თქვა.

ლანჩხუთელი გოგონები აუტის ხაზისაკენ დაიძრნენ, საიდანა ბანერი აიღეს, რომელზეც ეწერა:

„მოძალადის მხარდამჭერი ძალადობის თანამონაწილეა!“

ამის შემდეგ ქსკ „ლანჩხუთმა“საფეხბურთო მოედანი დატოვა. მათ ტექნიკური წაგება ჩაეთვალათ. მოედნის დატოვებიდან რამდენიმე წუთში, ქსკ „ლანჩხუთმა“ ოფიციალური განცხადება გააკეთა, რომელსაც უცვლელად გთავაზობთ:

„საგანგებო განცხადება!

ძალადობის მხარდამჭერი ძალადობის თანამონაწილეა! თითქოს არაფერი მოხდა, ისე გამოვიდეთ და ფეხბურთი ვითამაშოთ, არ იქნება გამართლებული.

სამწუხაროდ, ჩვენი დღევანდელი მეტოქე („ნიკე-ლუსო“) ის კლუბია, რომლის გულშემატკივრებმა და თანამშრომლებმაც გასული წლის სექტემბერში მოედანზე ფიზიკურად იძალადეს ჩვენს ფეხბურთელებზე და მწვრთნელებზე.

ეს ის კლუბია, რომელიც გასახდელებში დამონტაჟებული ვიდეოკამერებით იწერდა ფეხბურთელებს, შეგახსენებთ, რომ ამ კლუბში ასევე ირიცხებიან არასრულწლოვანი გოგონებიც.

და ბოლოს, ეს ის კლუბია, რომლის მფლობელი და პრეზიდენტი თავისი კლუბის ფეხბურთელის გაუპატიურების ბრალდებით დააკავეს მიმდინარე წლის იანვარში.

ჩვენი სრული მხარდაჭერა და სოლიდარობა სექსუალური ძალადობის მსხვერპლს, საქართველოს ეროვნული ნაკრების 20 წლის ფეხბურთელს, რომელიც თვეებია იბრძვის რომ დაუბრუნდეს ცხოვრებას ამ სიტყვის პირდაპირი მნიშვნელობით!“ _ აღნიშნულია კლუბის განცხადებაში.

ლანჩხუთის კლუბის პროტესტის მიზეზი გასულ კვირაში, თბილისის საქალაქო სასამართლოს გამამართლებელი განაჩენი გახდა, რომელმაც სექსუალური ძალადობის ბრალდებაში უდანაშაულოდ ცნო „ნიკე-ლუსოს“ ყოფილი პრეზიდენტი, თურქი ბიზნესმენი მეჰმეთ უიარი და 9-თვიანი პატიმრობის შემდეგ დარბაზიდან გაათავისუფლა.

20 წლის ფეხბურთელი (საქართველოს ეროვნული ნაკრების წევრი) კლუბის ყოფილ მფლობელს 2025 წლის დეკემბრის წვეულების შემდეგ ძალადობაში ადანაშაულებდა. თავად ბიზნესმენი ბრალდებას კატეგორიულად უარყოფდა. პროკურატურა გადაწყვეტილების სააპელაციო სასამართლოში გასაჩივრებას აპირებს.

ტექნიკური წაგების გარდა თუ რა სანქციას დაუწესებს სფფს ქსკ „ლანჩხუთს“ ჯერ-ჯერობით უცნობია.

მსგავსი სტატიები