ტელეკომპანია ავრცელებს მისი დაკავების კადრებს და წერს, რომ სამართალდამცავებმა ოპერატორზე იძალადეს, დაამტვრიეს მისი კამერა.
როგორც „მთავარი არხის“ მიერ გავრცელებულ განცხადებაში ვკითხულობთ, მათთვის ამ დროისთვის უცნობია, სად არის გადაყვანილი დაკავებული ოპერატორი.
საპატრულო პოლიციის დეპარტამენტის მთავარი სამმართველოს უფროსის მოადგილე გოგა მემანიშვილი „მთავარ არხთან“ საუბრისას ამბობს, რომ ოპერატორი „წესრიგს არღვევდა“ და თუ თავს უდანაშაულოდ მიიჩნევს, საკუთარი სიმართლე სასამართლოში უნდა დაამტკიცოს:
„რას იღებდა არ ვიცი, არ შევსწრებივარ მის დაკავებას. სერგი ბარამიძეს განუმარტავდა პატრულ-ინსპექტორი დაკავების არსს. სასამართლოზე მიბრძანდება და იქ დაამტკიცოს თავისი უდანაშაულობა. ოპერატორი ან ჟურნალისტი თუ კანონს არღვევს, ხელშეუხებელია? თვითონ დაკავებულს განემარტებოდა დაკავების არსი. თუ უდანაშაულოდ ცნობს თავს, სასამართლოში [იტყვის]“, – უთხრა გოგა მემანიშვილმა „მთავარი არხის“ ჟურნალისტს.
სამართალდამცავებმა ფიზიკურად იძალადეს „პუბლიკის“ ჟურნალისტ მინდია გაბაძეზე. როგორც ის რადიო თავისუფლებას უყვება, სამართალდამცავებმა მასზე მაშინ იძალადეს, როდესაც დემონსტრანტების დაკავების კადრების გადაღებას ცდილობდა:
„ძალადობრივი მეთოდებით აკავებდნენ დემონსტრანტებს და ამას ვიღებდი. რაღაც მომენტში მივხვდი, რომ სრულიად მარტო აღმოვჩნდი იმ მანქანებს შორის, სადაც დაკავებულებს ათავსებდნენ. ჯერ ერთმა პოლიციელმა მკრა ხელი, მერე – მეორემ. უკან გადავიწიე და ერთ-ერთმა პოლიციელმა, რომელსაც სახე არ უჩანდა, დამარტყა, გაიწია ჩემი ტელეფონისკენ. ვუთხარი, რომ ჟურნალისტი ვიყავი, მაგრამ ისევ მკრა ხელი და გადამაგდეს დაკავების მანქანების წინ, სადაც სხვა პოლიციელებს ჩემთვის აღარ ეცალათ“, – ეუბნება რადიო თავისუფლებას მინდია გაბაძე.
OC Media-ს ჟურნალისტმა მარიამ ნიკურაძემ სოციალურ ქსელში დაწერა პოსტი, როგორ წაართვა სამართალდამცავმა მას ტელეფონი, რომლითაც დემონსტრანტების დაშლის კადრებს იღებდა:
“აქტივისტებისგან გაწმენდის დროს ვიღებდი ვიდეოს. ერთმა მეორეს ანიშნა ჩემზე. მოვიდა, შემატრიალა, წამართვა ტელეფონი ცოტა ხნით, მითხრა, რომ “შენიანები” იქით გარბიანო. ვეჩხუბე, ტელეფონი დამიბრუნა, ვიდეო დაპაუზდა და არ ჩაიწერა ამ ჯაჯგურში”, – წერს მარიამ ნიკურაძე.
რადიო „თავისუფლება“
რადიო „თავისუფლების“ ფოტო
