მინერალური რესურსების ეროვნულმა სააგენტომ გურიის მდინარეებში ქვიშა-ხრეშის მოსაპოვებლად ახალი ლიცენზიები გასცა

გურიის მდინარეებში ინერტული მასალების უკონტროლო მოპოვებამ ბევრი უარყოფითი შედეგი მოუტანა რეგიონს. დიდი ალბათობით, მათი მიზეზით გახშირდა მეწყერული პროცესები, იქ სადაც კარიერებია ზიანდება საკარმიდამო ნაკვეთები, ნადგურდება საძოვრები, ჭებში დაშრა წყლები. სოფელ გურიანთის ტერიტორიაზე ცნობილ ფერმერს აკაკი ღლონტს კომპანია „პოლატის“ მიერ დიდი ზიანი მიადგა. მდინარემ 1,8 ჰექტარი საკარმიდამო ფართობი წაართვა, სადაც პავლონია და სხვა კულტურები ჰქონდა გაშენებული.

„პოლატიმ“2022 წელს 5 თვეში, მდინარე ნატანების აუზში, 20კილომეტრიან ზოლში 1 მილიონი კუბური მეტრი ინერტული მასალა ამოიღო. შარშან კიდევ ერთი მილიონი ამოიღეს და ახლა ახალ წრეზე არიან. არავინ ამბობს, რომ ქვიშა-ხრეშის მოპოვება არ უნდა ხდებოდეს, როცა ქეყანაში ასეთი მნიშვნელობის საავტომობილო მაგიტრალი შენდება, მაგრამ  ასეთი დიდი ოდენობის ქვიშა-ხრეშის მოპოვება გურიის მდინარეებში, ეკოლოგიური კატასტროფის ტოლფასია. მინერალური რესურსების ეროვნულმა სააგენტომ მდინარე ნატანების აუზში, მერია-ლაითურის საავტომობილო ხიდის ზემოთ და ქვემოთ სამი  ახალი კარიერის გახსნაზე გასცა  ნებართვა. ახალი კარიერი გაიხსნა მდინარე ნატანების აუზში, სოფელ მელექედურში…

ამჯერად მდინარე სუფსის ხეობაში შპს „სამი ძმა 20/22“ მიერ ქვიშა-ღორღის თემით დავინტერესდით.

წიაღის ეროვნული სააგენტოს მიერ 16 იანვარს გამოცემული #1005 ბრძანებით ამ კომპანიას მისცა ლიცენზია, 5 წლის განმავლობაში მოიპოვოს 200 000 კუბური მეტრი ქვიშა-ხრეში. ლიცენზიის პირობით, ამ კომპანიამ უნდა მოაწყოს საკარიერო გზა,წყალდამცავი ჯებირი, წყალდამწნევი თხრილი და მოპოვებული ინერტული მასალის ტრანსპორტირება დანიშნულებისამებრ განხორციელდეს საშუალოდ 15 მეტრკუბი ტევადობის ავტომობილით.

როგორც კომპანიის დირექტორმა კახა ჩხარტიშვილმა გვითხრა, ისინი ამჟამად მდინარის გასწორხაზოვნების სამუშაოებს ასრულებენ და უნდა აღადგინონ მათთვის ლიცენზიით განსაზღვრულ ტერიტორიაზე მისასვლელი გრუნტის გზა, რომელიც მდინარე სუფსამ წყალდიდობისას წაიღო. ხელშეკრულების შესაბამისად ინერტულ მასალას მელექედურის წიაღის გადამმამუშავებელ საწარმოში გაიტანენ.

2020-21 წლებში  მოსახლეობის საპროტესტო აქციების შემდეგ კომპანიამ „ქიუ ემ სი“ სუფსის ხეობის 4 სოფელთან გააფორმა „მემორდანუმი“, რომელიც მილიონიან დაფინანსებას ითვალისწინებდა, რომლითაც სილაურსა და ბაილეთში უნდა მოეწყოთ გზები, დახმარებოდნენ 4 სოფლის მოსახლეობას სასოფლო-სამეურნეო სამუშაოებში, თუმცა დაპირებულის 10 პროცენტიც არ შეასრულეს. ისარგებლეს რა ამ „მემორანდუმით“ მოსახლეობის კეთილგანწყობით, გასწორხაზოვნების მოტივით ყოველგვარი ლიცენზიის გარეშე დიდი ოდენობით ქვიშა-ღორღი ამოიღეს უშუალოდ მდინარე სუფსაზე არსებული საავტომობილო ხიდის გარშემო.

ასეთი მაგალითების მოყვანა სხვაც შეიძლება. მდინარე სუფსისა და ნატანების აუზებში ახალ პრობლემებს უნდა ველოდოთ.

მსგავსი სტატიები