ბორის პაიჭაძის სახელობის ეროვნულ სტადიონზე მორიგი ძირეული რეკონსტრუქციის განხორციელება იგემგება.

დინამო თბილისის პრეზიდენტის რომან ფიფიას ინიციატივით და დინამო არენის საავტორო უფლების მფლობელების ძალისხმევით, მომზადდა კონცეფცია, რომელიც ეროვნული სტადიონის თანამედროვე მოთხოვნებთან შესაბამისობაში მოყვანას, მისი ტევადობის გაზრდას, გადახურვას, მიწისქვეშა პარკინგის მოწყობას და ტერიტორიაზე საზოგადოებრივი და კომერციული ობიექტების განთავსებას ითვალისწინებს.

გია და არჩილ ქურდიანების არქიტექტურული სტუდიის „დინასტიის“ კონცეფციის თანახმად, არენის ტევადობა 70 ათას და მეტ მაყურებლამდე გაიზრდება, რისთვისაც გაუქმდება სარბენი ბილიკები. იგეგმება პირველი იარუსის სრული სახეცვლილება და ახალი იარუსის დაპროექტება, სადაც შესაბამისი გათვლების საფუძველზე, შენარჩუნდება სტადიონის უნიკალური ხედვის მრუდე – რათა არ დაირღვეს ტრიბუნის ნებისმიერი წერტილიდან არსებული კომფორტული ხედვა.

იგეგმება სტადიონის გადახურვის რეკონსტრუქციაც, რათა ორივე იარუსზე ყველა დასაჯდომი ადგილი (100%) მოექცეს გადახურვის ქვეშ.

მოხდება ტერიტორიის გარშემო არსებული ღობეების სრული დემონტაჟი და მისი გახსნა საფეხმავლო გამჭოლი მოძრაობისთვის. ტერიტორიის მიწისქვეშ მოეწყობა ერთსართულიანი, დაახლოებით 800 ავტომობილზე გათვლილი პარკინგი, პარკინგის თავზე, მიწისპირა დონეზე კი განთავსდება საზოგადოებრივი, კომერციული, სავაჭრო და გასართობი უბანი. აქ იქნება სტადიონის მუზეუმი, კლუბი, მაღაზია, კინოთეატრი და სხვა.

თბილისის დინამოს სტადიონი, რომლის ავტორი არჩილ ქურდიანი იყო,  1936 წელს აშენდა და 25 000 მაყურებელს იტევდა. 1958 წელს მცირედი რეკონსტრუქციის შემდეგ, ტევადობა 35 000-მდე გაიზარდა, 1976 წლის განხორციელებული ძირეული რეკონსტრუქციის შემდეგ კი არენის ტევადობამ 75 000-ს მიაღწია. 2006 წელს საჭირო გახდა არენის UEFA-ს ნორმებთან შესაბამისობაში მოყვანა, რეკონსტრუქციის შემდეგ კი მისი ტევადობა 55 000-მდე შემცირდა. დინამო არენას უკანასკნელად რეკონსტრუქცია ევროპის 2015 წლის სუპერთასის ფინალის მასპინძლობისთვის ჩაუტარდა.

წყარო: betsson.sport

მსგავსი სტატიები