რას საუბრობენ კულისებში და რას უპირებენ ქ. ოზურგეთის ისტორიულ ცენტრს (?!)

„ქალაქ ოზურგეთში კინოთეატრის რეაბილიტაცია დაიწყება“ ამ სათაურით 2017  წლის 5 აპრილს, 17 საათსა და 25 წუთზე iREGIONS. gE დაიდო ვრცელი ინფორმაცია ქ. ოზურგეთში კინოთეატრის რეაბილიტაციის შესახებ. ამის შემდეგ დაიწყო ქ. ოზურგეთის ადმინისტრაციულ შენობაში (ყოფილი ქალაქის მერია) თოჯინების თეატრისათვის დარბაზის სარემონტო სამუშაოები (ჩაიდგა მეტალოპლასმასის ფანჯრები, იწყებდნენ იატაკის გამაგრების სამუშაოებს),რომელიც შემდეგ გაურკვეველი მიზეზით შეჩერდა.

მას შემდეგ, რაც ავთანდილ თალაკვაძე ქ. ოზურგეთის მუნიციპალიტეტის მერი გახდა, კულუარებში დაიწყო საუბარი ქალაქის ცენტრის ისტორიული შენობების ( კინოთეატრი, ქალაქის მერიის შენობა, „ლიბერთი ბანკი“) დანგრევის შესახებ. სამწუხაროდ წინა მერი ნაკლებად კონტაქტობდა ადგილობრივ მედიასთან (4 წლის განმავლობაში ერთხელაც არ გაუმართავს არანაირი ბრიფინგი, ან პრესკონფერენცია)  ხოლო გამოთხოვილ საჯარო ინფორმაციებს ვერ ვღებულობდით.

2023 წლის 12 თებერვალს, ღამით, დღმდე დაუდგენელმა პირებმა გაზეთ „ალიონის“ ოფისში გააჩინეს ხანძარი, რისთვისაც მათ ე.წ. მოლოტოვისა კოქტეილები გამოიყენეს.რომელიც აალებადი სითხით იყო სავსე. გარდა ამისა, ასევე შემოაგდეს საწვავით სავსე ორ ლიტრიანი პოლიეთილენის ბოთლი, რათა ხანძარი გავრცელებულიყო და ზიანი ყოფილიყო მასშტაბური. აღნიშნულ შენობაში გარდა „ალიონის“ რედაქციისა, არის სტატისტიკის გურიის სამმართველო,  განათლების მუშაკთა პროფკავშირები, „გურიის მოამბის“ რედაქცია, და სხვა. ადრე შენობიდან დაქირავებულ ოფისში გადაიყვანეს ოზურგეთის ბაღების გაერთიანება, რომელსაც მუნიციპალიტეტი  ყოველწლიურად ქირავნობის სოლიდურ თანხას უხდის.

გაზეთ „ალიონში“ მომხდარ ხანძრის გაჩენის საქმეზე  შსს გურიის პოლიციის დეპარტამენტის ოზურგეთის რაიონული სამმართველოს წარმოებაში არსებულ სისხლის სამართლის #056120224001საქმეზე დანაშაულის ჩამდენი პირის ვინაობის დადგენის მიზნით  დაიწყო გამოძიება, ხოლო 2024 წლის 3 მარტის ბრძანებით შპს გაზეთი „ალიონი“ ცნობილინ იქნა დაზარალებულად…

ახლა 2017 წელს გამოქვეყნებულ კონკრეტულ სტატიას გავეცნოთ.

„დღეს ქალაქ ოზურგეთის მერი ბეგლარ სიორიძე “გოსფილმოფონდი”-ს გენერალური დირექტორის მოადგილეს სავკინა გალინას, მთავარ ინჟინერს სერგეი მელნიჩუკს და დელეგაციის სხვა წარმომადგენლებს – მიხაილ ვასინის და სვეტლანა დმიტრიევას შეხვდა. აღნიშნულის შესახებ ინფორმაციას ოზურგეთის მერია ავრცელებს.

ვიზიტის მიზანს ქალაქ ოზურგეთში კინოთეატრში ჩასატარებელი სარეაბილიტაციო სამუშაოების მოცულობის განსაზღვრა წარმოადგენდა. “გოსფილმოფონდი”-ს წარმომადგენლებმა ქალაქის მერთან ერთად კინოთეატრის შენობა დაათვალიერეს და შენობაში არსებულ სიტუაციას დეტალურად გაეცნენ.

“მოხარული ვარ, რომ უახლოეს პერიოდში კონოთეატრის რეაბილიტაცია დაიწყება. სტუმრები შენობაში არსებულ სიტუაციას უკვე გაეცნენ და ძალიან საინტერესო გეგმები დასახეს, რისი განხორციელების შემდეგაც, ქალაქ ოზურგეთს თანამედროვე სტანდარტების შესაბამისი კონოთეატრი ექნება. წარმოდგენილი იქნება არა ერთი, არამედ სამი კონოდარბაზი, ასევე, სივრცე პატარებისათვის მულტიპლიკაციური ფილმების სანახავად. ჩემი წინასაარჩევნო კამპანიის დროს ახალგაზრდების ერთ-ერთი ძირითადი თხოვნა კინოთეატრის აღდგენა გახლდათ. გამომდინარე აქედან, განსაკუთრებით მახარებს ის ფაქტი, რომ მათი ეს სურვილი მალე რეალობად იქცევა. სახელმწიფო თეატრი და ფოლკლორის ცენტრი რეაბილიტაციის პროცესშია, მალე კინოთეატრის გარემონტებაც დაიწყება. ამ სამი უმნიშვნელოვანესი პროექტის განხორციელებით, ჩვენ, ფაქტობრივად, ისტორიულ პროცესს ვახორციელებთ. ვხედავთ, რომ ქალაქის ცენტრალური ნაწილი აბსოლუტურად იცვლება”, – აცხადებს ბეგლარ სიორიძე.

2016 წელს “გოსფილმოფონდი”-სა და საქართველოს კინოცენტრს შორის გაფორმდა ხელშეკრულება, რომლის თანახმადაც საბჭოთა პერიოდში (1921-91 წლები) შექმნილი ქართული ფილმების საწყისი მასალების დამზადება და საქართველოსთვის მათი ეტაპობრივად გადმოცემა უნდა განხორციელდეს. პირველი ეტაპის განხორციელების შემდეგ, როდესაც სამშობლოში 4 ქართული ფილმი ჩამოვიდა, პროექტის პრეზენტაციაზე საქართველოში ვიზიტით ფილმსაცავის გენერალური დირექტორი ნიკოლაი ბოროდაჩევი იმყოფებოდა, რომელმაც გამოთქვა სურვილი “გოსფილმოფონდს” თავისი რესურსით აღედგინა რომელიმე რეგიონული კინოთეატრი. არჩევანი ოზურგეთის კინოთეატრზე გაკეთდა.“ _აღნიშნულია წერილში.

ჩვენი ამჟამინდელი სტატია გაცნობითი ხასიათისაა. გაზეთ „ალიონის“ რედაქტორი ქალაქის ისტორიული შენობების ბედზე ორჯერ გამოვიდა ოზურგეთის მუნიციპალიტეტის საკრებულოს სხდომაზე და ცდილობს ხმა მიაწვდინოს საზოგადოებას _რა იგეგმება ოზურგეთში. ბოლშევიკების (კომუნისტების) ზეობისას და შემდეგაც იყო რამდენიმე ნგრევა-ხელოვნური ხანძრის პრეცედენტი, რომელმაც ოზურგეთს მნიშვნელოვანი ზიანი მიაყენა.

ჩვენ, ამ თემაზე მომავალში უფრო სრულყოფილ სტატიას მოგაწვდით. ამჟამად გვინდა შეკითხვა დავუსვათ ჩვენს დეპუტატს საქართველოს პარლამენტში ბატონ ვასილ ჩიგოგიძეს, ოზურგეთის მუნიციპალიტეტის საკრებულოს თავმჯდომარეს, ბატონ დავით დარჩიას, საზოგადოებას უპასუხონ, რასაც კულისებში საუბრობენ ჭორია თუ სინამდვილე. რას უპირებენ ოზურგეთის ისტორიულ ცენტრს? აღადგენენ, კულტურული მემკვიდრეობის ძეგლების სტატუსს მიანიჭებენ თუ ვინმე ნაცნობ „ბიზნესმენს“ მიჰყიდიან, გასართობი ცენტრის, თუ  სავაჭრო ობიექტების ასაშენებლად?

იმედია ამ თემაზე საუბარს, ქალაქის ადმინისტრაციულ შენობაში მყოფი სხვა ორგანიზაციების ხელმძღვანელებთან ერთად, ბატონ პაატა კუნჭულიასთანაც შევძლებთ.

იქნებ ერთად, ერთიანი აზრით გადავარჩინოთ ოზურგეთის ისტორიის მნიშვნელოვანი ნაწილი.

მსგავსი სტატიები