ხარიტონ ჩხატარაშვილი – კაცი, რომელიც მთელი ცხოვრება ქართულ ფეხბურთს უძღვნის თავს

გურიის ფეხბურთისთვის განსაკუთრებული ფიგურაა ხარიტონ ჩხატარაშვილი. დაიბადა 1959 წლის 16 აგვისტოს, ოზურგეთის რაიონის სოფელ შემოქმედში.

ჰყავს მეუღლე ირინა შარაბიძე, ორი შვილი – ნინო და თემური, და ორი შვილიშვილი – ნიკა და ილიკო.

1981 წელს წარჩინებით დაამთავრა ბათუმის შოთა რუსთაველის სახელობის სახელმწიფო პედაგოგიური ინსტიტუტი (დღევანდელი ბათუმის შოთა რუსთაველის სახელმწიფო უნივერსიტეტი).

საფეხბურთო კარიერა დაიწყო ბათუმის „დინამოში“, სადაც 1980-81 წლებში ასპარეზობდა (მწვრთნელი ლერი ველურიძე).

1982 წლიდან მუშაობა დაიწყო ოზურგეთის „მერცხალში“ ბავშვთა გუნდის მწვრთნელად. უკვე 1983 წელს სოფელ შემოქმედის საშუალო სკოლის ბაზაზე ჩამოაყალიბა გუნდი – შემოქმედის „ჩაქუხა“. იმავე წელს გუნდი ასპარეზობდა „ტყავის ბურთის“ რესპუბლიკურ გათამაშებაში, გახდა რესპუბლიკის ჩემპიონი და მონაწილეობა მიიღო საკავშირო პირველობაზე ტალინში, სადაც სკოლის გუნდმა საპატიო მესამე ადგილი დაიკავა.

1986 წელს „მერცხალის“ მთავარი მწვრთნელის, სოსო გაგუას მიწვევით, მუშაობა დაიწყო ოზურგეთის „მერცხალში“ მეორე მწვრთნელად. 1987 წელს გუნდი საქართველოს ჩემპიონი გახდა.

1996-1998 წლებში იყო „მერცხალის“ მთავარი მწვრთნელი.

1999-2005 წლებში მუშაობდა ბათუმის საფეხბურთო კლუბ „ლუკას“ მთავარ მწვრთნელად და კლუბის დირექტორად.

2006-2013 წლებში ხელმძღვანელობდა ოზურგეთის „მერცხალს“ – იყო მთავარი მწვრთნელი და დირექტორი. მისი ხელმძღვანელობით გუნდი რეგიონალური ლიგიდან საქართველოს ჩემპიონატის პირველ ლიგაში გადავიდა.

2012 წელს მისმა გუნდმა მოიპოვა უმაღლესი ლიგის საგზურისთვის მონაწილეობის უფლება და მიზნის მიღწევას ძალიან ცოტა დააკლდა.

2014 წლიდან ხელმძღვანელობს ოზურგეთის „მერცხალის“ ბავშვთა ფეხბურთის განვითარების პროგრამას.

ხანგრძლივი და ნაყოფიერი მუშაობისა და ქართული ფეხბურთის განვითარებაში შეტანილი განსაკუთრებული წვლილისთვის 2012 წელს დაჯილდოვდა ღირსების ორდენით. ამავე წლიდან ფლობს UEFA-ს „A“ ლიცენზიის დიპლომს.

2019-2020 წლებში იყო ს/კ „ბახმაროს“ მთავარი მწვრთნელი.

„არასდროს მიფიქრია, რაიმე სხვა მეკეთებინა. დიდ სიამოვნებას მანიჭებს ის საქმე, რასაც ვაკეთებ და ვცდილობ, ბოლომდე დავიხარჯო!“ – ამბობს ხარიტონ ჩხატარაშვილი.

მისი ხელით არაერთი ცნობილი ფეხბურთელი გაიზარდა, რომლებმაც მნიშვნელოვანი კვალი დატოვეს ქართულ ფეხბურთში და ეროვნულ ნაკრებშიც: ირაკლი ზოიძე, ლაშა სალუქვაძე, მიხეილ ქობულაძე, ავთანდილ ცერცვაძე, ჯონი კალანდაძე, ნოდარ მაჭავარიანი, გია გოგუა, კახა როხაძე, გია ავალიანი, ზაზა ტუღუში, ნიკა ჭკუასელი, იონა კალაჯიშვილი, ელგუჯა ჩხაიძე, რამაზ ასკურავა, შოთა მანჯავიძე, ლაშა ქათამაძე, დავით სიამაშვილი და სხვა მრავალი.

მისი ინიციატივითა და ხელმძღვანელობით ჩატარდა ვეტერანი ფეხბურთელისა და მწვრთნელის კოტე გოგატაძისა და სოსო გაგუას სახელობის თასის გათამაშება, რომელშიც ორასზე მეტმა ბავშვმა მიიღო მონაწილეობა.

ხარიტონ ჩხატარაშვილი არის მწვრთნელი-ინტელექტი, ფსიქოლოგი და პედაგოგი – ასე ახასიათებენ მას მისი აღზრდილი ფეხბურთელები. იგი დღედაღამ ქართულ ფეხბურთზე ფიქრობს და ბევრ სასიკეთო საქმეს აკეთებს.

აღსანიშნავია, რომ ალექსანდრე ქურდობაძესა და ნუგზარ ასათიანთან ერთად გამოსცა  წიგნი ოზურგეთის „მერცხალზე“, სადაც კლუბის სრული ისტორიაა თავმოყრილი.

ფეხბურთი უყვარს და ფეხბურთით ცხოვრობს. დიდი სიყვარულითა და პატივისცემით სარგებლობს მეგობრებსა და საზოგადოებაში. დღევანდელ რეალობაში იშვიათია ადამიანები, რომლებიც პროფესიის ერთგულნი რჩებიან და საკუთარ საქმეს უანგაროდ ემსახურებიან. ხარიტონ ჩხატარაშვილი სწორედ ასეთია.

ასეთი ადამიანების დაფასება აუცილებელია – ერთგულებისა და პროფესიონალიზმის წასახალისებლად და ქართული ფეხბურთის მომავლის გასაძლიერებლად.

მსგავსი სტატიები